乜乜靠得住，豬乸會上樹。

四月 26, 2006 in 創業紀與騙徒行傳

大前晚同友人食飯，席間友人F 的太太投訴丈夫當自己係祕書，一個電話係深圳打落黎，就要幫佢出信啊打乜打物啊，唔知上面深圳個祕書識做乜，我開玩笑叫友人同祕書映張相俾太太睇＜睇下係咪可以坐大脾打字果種＞，友人＜呻＞上面既人唔可靠，我都有同樣體會。

由於在舊公司工作範圍關係，以前主要同台胞、韓國人交手為主，至於國內同胞，除左試過訓練內地支部同事＜相當勞心勞力勞氣＞，以及在國內工作的朋友既評語＜負面居多＞之外，對國內同胞佢地既工作態度，我了解不算太深入。

前幾個星期帶日本客人到東莞一趟參觀廠房，成行之前一日，已經有拍檔到東莞打點一切，當日拍檔會在車站等候，坐廠車去廠房，拍檔亦交帶司機直接入廠，唔駛返酒店接其他人＜K君＞。

坐上廠車後，日本客人已問去廠房車程需時＜約廿分鐘＞，廿分鐘後廠車停左係酒店門外，拍檔問司機＜幹嗎？等誰？＞＜等K君！＞＜K君已經回廠！＞＜……………..＞

糾纏不清數分鐘後，日本客人又問﹕＜どうして停車する？ / 為何停車？＞，終於，我等港燦降伏司機，乖乖上路。

終於到達廠房，一進門接待小姐已撲出來﹕＜K君出緊黎！＞。。。。十數分鐘後，K君現身，但K君話根本唔知我地到左，亦無人通知佢，K君知道我地點解遲到後，重慶！

好彩間廠係台胞打骰＜整個管理層＞，以夷制夷！