朋友之二

December 12, 2006 in 生活／感覺

上次寫既野竟然有人認同？無理由既！

***

之前有個耐唔耐就打個電話黎問候下既朋友，叫我出去聽下個保險計劃＜係，佢係做保險既，不過我無戴有色眼鏡睇人地＞，出黎之前我講到明「齋聽」唔會考慮，因為剛剛買左一份新既，佢亦明我講乜。

好啦，成餐飯你有你既道理，我有我既理由， wrong timing ，唔買就唔買， dead air 到完場，你老哥竟然爆左句﹕

「呢餐飯不如 AA 制咯！」

你想點？唔係 AA 唔通要我俾？我從來無諗過你 sell 我我就要屈你，但你唔係諗住要我俾丫馬？
定係你覺得呢餐飯蝕左三十八蚊我要俾返你？

一＞以前都知你硬膠，估唔倒越黎越。。。。
二＞原來大家既關係唔值三十八！
三＞其實，我想知如果我無賴到「扮唔夠錢」，你老哥會點反應呢？

***

一直以來，都有唔少朋友＜或其他人＞向我推銷，包括傳銷、 Life dynamic 、渡假屋使用權、投資計畫、乜乜物物，其實我無所謂，聽下你講野我無損傷，反正我都曾經係一個積極發展既傳銷商，再到依家自己出黎學人做生意，點會唔明？

但好多人既技巧真係要改善下，而且連自己都對產品無信心，點 sell 個客？

「不如黎聽下我地既傳銷計劃丫？」
「好，不過聽完之後你又過黎聽下我地 d 產品同計劃喎，我都係做傳銷既！」
「 errrr……………………… 」
「不如下個星期啦！」
「下次再約啦！遲 d 搵你！拜拜！」

# 我都唔明，做傳銷又唔係做賊，咁驚做乜？你既「上線」無教你咩？

「 Hello ，我係你既好朋友介紹黎打俾你，向你介紹保險計劃既」
「邊個朋友？」
「你位朋友唔想我講出黎喎！」
「咁你等佢想講先啦，係咁！」

# 我話 Q 知你係銀行買我既資料又好，真係「好朋友」介紹又好，關我 Q 事？

「你試下係心裹面畫個圓形，代表你識幾多野，睇下有幾大，你係咪覺得點都係好細呢？」
「對唔住，我從來唔會畫地自限，更唔會俾知識規限自已。。。。咁樣你唔會 sell 倒我你明唔明？」

# 我呢個舊上司做人無乜自信，要靠呢 d 課程黎肯定自己價值，對唔住，我知自己係乜位，而且呢 d 課程真係好「屎」！
唔知咁多年後，佢有無成熟左？

Related topic:

差勁

賣電話就賣電話啦，學人賣保險！

卡甩慌泥丫