俺たちの旅

七月 28, 2009 in 不一樣的回憶

邊喝啤酒、邊聽中村雅俊，大懷舊一番。 最近除左搵翻 MJ 既 MV 出黎播，就係研究舊灣仔，睇下細個同外婆去過既地方，依家係邊樹。 Related topic: Gメン’75

Bosco 週記＜十八＞

十月 3, 2008 in Bosco, 不一樣的回憶

今年肥爸終於帶左我去睇舞火龍，重見倒表舅公添，我重知道太婆＜即係肥爸既婆婆＞細路仔既時候住係邊條街 靜靜雞話俾大家知，原來去睇舞火龍好悶架，肥爸重以為好似廿幾三十年前咁，無乜人睇人人可以行埋去條龍度～肥爸話下次咪搞！

空凳

八月 28, 2008 in 生活／感覺, 不一樣的回憶

遠古的回憶

七月 25, 2008 in 不一樣的回憶

今晚同 F 君係垃圾速食店飲野＜其實我自己都唔明係呢度飲野有乜好？＞，遠遠已經見倒呢位朋友 – 簡小姐 其實我同簡小姐真係唔係好熟，只係小學年代做過下朋友，之後就斷斷續續係屋企附近碰倒，有時係我去佢工作既地方買野食，有時見倒佢收工，但我就無同佢相認咯，始終大家生活圈子唔同晒，無乜野好講～ 差不多近十年無見過佢，今晚一見，佢竟然目光停留我面上兩三秒，唔係丫麻，咁都認得出我？我咁好眼都要定一定神先認得出佢….. 青春真係一件幾奇妙既野，無人提起，可能現在既簡小姐都唔記得好耐以前既自己係幾咁有活力，不過我已經唔能夠係佢眼中搵倒一絲既痕跡 祝佢生活愉快～

靠開波搵飯食

七月 17, 2008 in 不一樣的回憶

之前看過園主有關網球的一篇而想起﹕ 中學時代非常沉迷乒乓球，但小弟的基本功一直較弱，唯有在發球技巧上發力，再配上高質素的球拍，務求打出高速、落點刁鑽、甚至帶高速自旋的球＜對經驗不足、大意的球手，足以令乒乓球碰到膠皮後高速飛離出界＞，將對手「擊殺」 勝負真的這樣重要嗎？當時流行的玩法是「搓人」，球技不精可能要坐很久「冷板凳」，所以就算是球技比較高竿的幾位同學，也對發球技巧有更高層次的「修練」來「用在一招」，高手「失手」可不是好玩的～ 但過份偏重於發球，往往傾盡全力發球而被對手從容擋下＜波動拳？＞，繼而無力招架對手後來之反撲，可悲！ 因此時間一久，發覺「一招定勝負」真的悶出個鳥來，不論是「殺」還是「被殺」，均是一招了，兩方之交流少之少，沒有意思 還是追求大家拍來拍往，係檯上搓死對方好玩得多

第一次入廚經驗

一月 29, 2008 in 不一樣的回憶

我的第一次入廚經驗，是十多二十年前的某一天為外婆做的午餐 外婆因為跌倒受傷而不良於行，多年來由外傭照顧，那年剛好外傭放長假回鄉，就由我們三兄妹 轉 輪流留在家照顧 之前一晚已想好兩道菜﹕金菇炒蛋、炒雞柳 「廚神」母親大人反對，認為不應該用金菇來炒蛋，因為金菇會「出水」云云。。。。最後「廚神」當然要指點一下 記憶中，用了半個上午的時間跟雞腿搏鬥＜當時凍肉鋪不多供應雞扒，多數用雞腿起骨做雞柳＞～ 其他的細節都不大記得，除了外婆的稱讚外，哈哈！ *** 外婆曾為我做過無數次午餐，這午餐大概是我為外婆做的唯一一次吧～ *** 外婆年青時是富家大小姐一名，這又是另一個故事了

Angel Heart

八月 21, 2007 in Music, TV/Movies, 不一樣的回憶

Buck Rogers in the 25th Century

八月 13, 2007 in 不一樣的回憶

八十年代某年暑假係無記播過，好似叫＂廿五世紀宇宙戰爭＂

愛的反面就是恨？＜一＞

六月 11, 2007 in R&D血淚史, 不一樣的回憶

我呢個人，愛恨分明，喜歡的話，忠心不二，變心的話，嘿嘿！對人如是，對僱主亦如是。 *** 係我離開第一間公司，跳到「摩記」既頭一兩年，我應新老細 TS 既要求，將舊公司既部份較有經驗同事「撬」過黎，除左有獎金之外，我係有少少報復心理，當初我雖然走得瀟洒，但心中對舊公司總有點不忿。 因為有人通水既關係，舊公司一直清楚我既動作，我好感謝管理層係呢件事上既大量，我連一個電話都無收過，甚至我「策反」舊公司一個比較重要既職員﹕ G 君 「重要」既其中一個意思係佢比我更資深！ 當日既高潮係，因為舊公司剛剛升左 G 君＜加埋薪添！＞而令佢十五十六唔知走唔走好，星期六下午我走上舊公司，當時重有小半同事係度做緊野，管理層就係另一層辦公室隨時走入黎果隻，而我就係其他舊同事面前「大模施樣」走入 G 君既辦公室，關上門同佢傾左好耐。 我同 G 君分柝左唔少走既理由，我諗大約係「你係呢度無乜野發展既機會」之類，我俾時間佢考慮下，其實我都無信心＜升左又加左喎！＞，到左星期一 G 君終於下定決心！ G 君到今時今日都重係我朋友，佢好慶幸我「拉」左佢走出呢間公司。 *** 另一件事我一直好想寫低佢，裏面發生既詳情好多舊同事都唔知，令佢地對我有唔少誤解，甚至有人以為我幫左老細追女仔而上位，我不如趁呢一刻自己公開內情啦！反正所有當事人都不在其位勒。 當年係「摩記」做左一段時間後，覺得自己係公司既發展機會有限，同上司 KK 更理念唔同， KK 經常強調上司下屬要有和諧、親密關係，大家要好 friend 先方便做野，搞到成班同事放左工都要去埋 d 大家都唔 enjoy 既聯誼，我就成日都寸佢無聊，做得野你理得我放工劈酒定唱 K 丫？所以大家唔咬弦就一定啦！ 就連「撬」 G 君過黎呢件事，都可以令呢個小氣老細唔高興，事源請我番黎既 TS 已經唔係我上司，但我同佢都幾好朋友下， KK 當然唔高興啦，更唔高興既係後面， TS 要求我幫手搵個比較有經驗既人入去佢果 team ，目標當然係 G 君啦，等我搞得七七八八既時候， KK 同我講點解唔將 G 君介紹入我地呢邊，佢話佢都有 head count [...]

富記

六月 11, 2007 in R&D血淚史, 不一樣的回憶

今晚「財經透視」訪問「富記」老總 Edwin ，有關回歸前後香港高科技發展～ 成十年無見，唔知佢係咪重係咁憎我呢？ 下一篇既下集，係同佢有關既，不過我未諗到點寫～

東照宮

六月 10, 2007 in Web2.0, 不一樣的回憶

十多年前第一次到東京時，曾到上野東照宮一遊，我相信一般人未必對家康君的衣冠塚＜上野＞有興趣，我不理，一個唔該拉埋朋友入內 當日只用傻瓜機拍了幾張照片，質素麻麻費事再 scan ，唯有借用網上照片 *** 唔駛懷疑，以上文字雖然無包括電話地址網頁，但絕對有廣告嫌疑，不要怕麻煩，請在留言區發起提請刪除投票，多人支持﹛﹛刪除﹜﹜一定會刪除，放心好了

邊度都有陽光

五月 4, 2007 in 不一樣的回憶

呢排個個都寫「檸檬茶」，唔寫番一篇半篇就政治唔正確啦，其實我對檸檬茶無乜感情，唯一既就只係「陽光檸檬茶」廣告，可能我係俾七、八十年代廣告餵大既，只對廣告影象有感情，反正今晚無心機做正經野，咪借機重溫下廿年前既少男回憶，三字頭既我當年咪少男咯，你呢？ 張柏芝果篇我覺得唔夠何嘉莉果篇拍得咁「出」，只係張柏芝既外貌搶番晒分﹔可惜，搵唔倒樊奕敏擔正果篇，有無人有？ ＊新增「樊奕敏」版本 Related topic: 檸檬茶短篇

Apollo

三月 13, 2007 in 軟件, 不一樣的回憶

好多飲 M$ 奶水大既人，可能見都未見過其他 GUI ，我係九十年代初就係用緊下面既 Apollo desktop manager 或者 SunView ，甚至後來既 CDE / NEXTSTEP ，佢地隻隻都先進過當時既 M$ Windows 多多聲！ 都唔講當時既 Mac OS 同之後既 Mac OS X (Aqua) 勒 ＜可惜搵唔倒一張 Apollo desktop manager 較後期既相，即係 Apollo DN3000 既時代，果時既 GUI 係有彩色架＞ 當左 M$ Windows 萬能既青蛙，請繼續「娃娃」聲咁叫啦～～～

酒

三月 13, 2007 in 生活／感覺, 不一樣的回憶

之前見 pk_ 兄寫「酒」呢個題目，搞到我都想拎支酒出黎啖番兩口，不過喉嚨同個鼻唔爭氣，唯有「寫」出黎止下癮～ 記得細細個已經試過飲酒，但感覺上唔多吸引，唔多明白大人做乜飲 d 咁苦既野，到左十六、七歲，先開始領略出酒既「味道」，除左同表哥出去老尖飲番兩杯，閒時係屋企都會嘆番支啤。 本來一直都飲得唔多，直到出黎做第一份工，嘩！公司對面有成十間酒吧，就開始黎料，果時唔理開唔開 OT ，都要落去坐下，飲番幾杯先安落。 主要飲啤酒，或者係威士忌、 Vodka ，我就唔鍾意溝乜溝物，近年聽倒人話要「綠茶」？下？咁重飲黎做乜？我連 cocktail 都麻麻地，最多飲 Bloody Mary ，飲酒都係鍾意簡簡單單加幾粒冰就可以﹔我鍾意飲酒，但係唔需要何時何地都要飲，由其係吃晚飯，當個個打緊邊爐食緊刺身或者「去飲」，由十六到六十都要飲番杯既時候，我通常都係﹕「唔該俾杯茶我！」，飲完酒，食乜都無味啦，唔好搞我！ 咁有時一個海鮮做主菜既晚餐，再加支白酒我都好受落既，我更喜歡用酒做調味料～ 飲酒係享受而唔需要強調自己飲得，何況我真係唔多飲得，所以「隊」、「劈」唔好預我，見倒人地一桶桶、一打打咁黎，對唔住，唔岩我咯。但呢個世界就係咁，當你唔多飲得，就個個以為你好飲得，甚至有新郎哥擺我出黎「頂」，不過我係兵不血刃果種，因為搞事者以為我「難哽」而「縮窒」多！最搞野試過有兩位仁兄拎大半支 XO 黎「挑機」，我話好丫，我指指檯上重有大半未凍既紅豆沙，叫佢地「吹」左先，佢兩個竟然好認真咁商量左一陣之後走左去，我又過倒骨！ 酒同雪茄一樣，你都係追求越來越好既貨色，唔一定係銀碼，而係想試下更上一層樓既感覺。 以前唔識野，以為自己鐘意芝華士，卒之大妹買俾我果支，飲極都飲唔晒！ 因為大妹有個朋友係賣酒既，所以有一段時間我睡房收埋左好多支好好飲既紅酒、白酒，你叫我去研究，我就無乜心機勒，但依家就算其他朋友介紹既，又總係覺得唔夠正～ 我酒齡唔算長，出黎做緊第一份工無幾耐，可能飲得太多身體就出事，竟然係皮膚敏感，我好乖真係停左一排醫返好又黎飲過，一直飲到三字頭，就開始知道節制，終始人唔係機器， Quota 有限。飲得最狼既就係同韓國人一齊合作做 project 既時候，由玉露、真露，到紹興酒、玫瑰露，真係飲到差 d 唔識返屋企﹔就算有乜理由都好，我從來唔俾自己醉到要人抬，幾時係最後一杯，自己最清楚～ 我心中最懷念都重係八九年係鄉下飲既果幾杯唔知「雙蒸」定「三蒸」！ 有機會再講下雪茄、甚至咖啡

報應

二月 11, 2007 in 創業紀與騙徒行傳, 不一樣的回憶

心地善良既朋友請跳過這一篇，不過，平時睇開我嘔泥既都唔慌係「善男信女」咯～～哈！ 幾日前，同媽咪搭車時講起，媽咪話果個「阿慶」衰到要靠拎綜緩，佢重話呢個世界真係有報應！ 係！我認同架，我望佢折墮好耐！甚至認為佢重未衰到貼地！ … 大約係三十年前，爸爸同三個拍檔成立左一間公司，開業無幾耐已經成為行內數一數二既「大行」，錢搵倒幾多我唔太清楚，但知名度真係唔小，連借過架靚車俾我既果位大老闆，都曾經係爸爸教出黎既徒弟。 「阿慶」就係爸爸既其中一個拍檔～ ＜本來，爸爸係我地屋企漂染廠幫手既，至於點解要出黎另創江山，又係另一個故仔勒！＞ 我記得當時公司環境唔差架，剩係睇過年過節，公司洗幾多錢招呼班客同伙記就知咯。 我知最初爸爸用自己人黎睇住盤數，後來就唔係勒，亦係錯誤既開始。「阿慶」用錢＂乙水＂走左一個股東，再聯同另一個股東「阿龍」炒左爸爸呢個股東，媽咪話公司只係賠左可恥既十幾萬俾爸爸，後來「阿慶」再俾人呃既任何一條數都唔止呢個數目！係零頭都唔止！ 你會問，爸爸都係股東，咁易俾人整走？係，有時「騙／被騙」就係咁簡單，爸爸係一個面惡心善既老好人，講奸講古惑佢唔入流，而且佢到果一刻先知﹕＂朋友，係要黎出賣既！＂ 果幾年，爸爸好唔開心，佢係憤怒到唔知點同我地講，我呢個做仔既當年唔係咁清楚詳情，亦唔多識體諒爸爸既心情，依家諗番起都覺得自己不孝，唉～～～ … 我心裹面一直認為，爸爸因病早逝，同呢件事或者果個「阿慶」有或多或少既關係﹔另外，我重好記得果次我地一家人係地鐵車廂內碰到「阿龍」，爸爸同佢既表情，我一世都記得！ 再見番「阿慶」，已經係上年既事，佢唔認得我，見佢拎支拐杖，原來佢跛左，都係媽咪果句﹕＂呢個世界真係有報應！＂ 自此，我講起呢個人，只係會叫佢做＂果個「阿慶」＂，係我心中，「慶叔叔」已經唔再係「慶叔叔」，其他兩個都係～ *** 所以，我從來唔恨做老細！ Related topic: 好恨做老細？