君子交絕，不出惡聲

六月 20, 2008 in 生活／感覺, 創業紀與騙徒行傳

最近無乜心機寫野，除左近呢一個月比較忙，更要處理一件因「反面」而要加速處理既新工作 本來我同 F 君都有幫一位朋友手，有車馬費收番，其實大家無拖無欠，至於是多是少我自己都唔係太介懷，反正不滿意就拉倒算，唔駛為呢 d 事而傷神＜諗下有無其他路數好過啦＞，亦無謂為丁點利益而傷害友情 我亦成日安慰 F 君無謂太在意，朋友間公司我地無股份，甚至連一個職員既身份都不如，人地唔聽你呢個所謂顧問既意見，算啦 其實我一早預左對方唔再想用我，朋友同佢既拍檔諗乜我點會睇唔穿？＜佢拍檔唔鍾意我同 F 君，盲既都睇得出＞ F 君為我而唔高興，我反而好淡然，套用我上一段既睇法，無既，朋友絕對有權咁做，我只係介意，點解要編一個罪名俾我呢？ 既然你要唱我，不論你係有心定無意，目的為何，友情二字，不用再提～亦終於明白對方身邊既人點解會一個又一個咁離開～ 我無興趣唱番對方，只係覺得有 d 事情，已經不用再留手 且看後事如何！

照妖鏡

十二月 4, 2007 in 創業紀與騙徒行傳

兩方既關係到左一個階段，一方就想同另一方立下誓約，確定一下大家既關係 誓約，就好似一塊照妖鏡，對方係人係鬼，好易知，一照，得左！ 我係講緊傾生意，當然，隻妖走左～

商道

十月 25, 2007 in 創業紀與騙徒行傳

「做生意不是為了賺錢，而是為了賺取人心」 聽落好似講到好高尚，不過都幾岩架，好多人可以成功做成一單生意，但往往令對方會覺得蝕底左，無下次，甚至連朋友都無得做～ 有時唔駛計到咁盡既，大家都有付出過，想一腳踢開人地，將來唔好怪人唔幫手

求存

十月 18, 2007 in 無序社會, 創業紀與騙徒行傳

上個月聽左呢集，一直都諗緊貼唔貼出黎，因為唔想其他人只係注意左果個「叫雞」理論，但蕭生所講既真係好多人既通病，就好似以前旺角既芝士餅店，同依家既大陸國狗＜氣槍＞ *** 呢兩個星期幾忙，係呢個商業社會生存真係唔容易，我要努力！！！！

信

十月 12, 2007 in 創業紀與騙徒行傳

有 d 人你唔應該同佢傾生意，因為佢地永遠唔會講真話，永遠唔會信你講既野～ 傾生意唔可能句句都係真話，但至少都係有限度既真話卦？點解唔可以坦白 d 呢？就算係老作都快手丫！唔得咪唔得咯！ 好不幸，呢幾日我遇到幾個～

Demo の悲劇

八月 15, 2007 in 創業紀與騙徒行傳, 悲劇系列

請告訴我，如果閣下「嫌錢腥」，我不用再白花力氣下去～ 我不明白，用一個月時間預約的示範，竟然是這樣？當然，這是閣下的生意，我管不了，但請不要害我！ 今天應該很「慶」！

極限

八月 11, 2007 in 創業紀與騙徒行傳

上星期同朋友食晏，過程極之無癮～ 呢位朋友係我朋友當中，以個人能力黎計，佢真係無出其右，不過可能個人能力太強，或者自信心過高，往往將其他人睇得太低，而且睇野唔夠全面。 事情發生既經過係咁既﹕之前經我介紹，朋友間公司多左個生意機會，可能呢位朋友唔恨錢，最後俾佢搞到「獲」左，連我都要上埋身，不過算啦，我都重要「安慰」番佢轉頭，應該重有其他合作機會既。 話咁快就有另一個合作機會，不過今次似乎觸動左呢位朋友既神經，佢開始認為所謂既合作，最終令對方會變成競爭對手。 其實個市場咁大，只要有利可圖，呢個 party 唔玩，都有其他人玩架，係咪？依家經我呢個連系，朋友可以插手入去一個新品牌內，提供服務照收錢可也，你擔心新品牌搶左你 d 客，點解唔可以諗成人地個品牌搵倒 d 新客、新市場俾你？ 係餐飯裏面，朋友開始批評我既建議，重越講越激動，搞到同檯既其他人唔敢出聲，氣氛有咁尷尬得咁尷尬！我就故意沖淡咁緊張既氣氛，冷淡咁回應啦，始終硬碰硬，盞不歡而散～ 到最後，朋友既批評開始對人不對事勒，大致上係睇人地唔順眼之類，唉！朋友，我對你真係失去左合作既信心。 做生意，係講合作而唔係太過強調個人既能力，你再強都係一雙手、一個腦，就算你有錢請好多有能力既人幫手但唔識得點同佢地相處的話，你有再多錢都留唔住人材。 而且，你有你既個人喜好、厭惡唔緊要，但無必要成日提住，對下屬／合作伙伴更提不得，一個太容易被個人情感左右既管理人，下屬／合作伙伴只要一有機會就離棄你！ 你有幾叻、有幾睇唔起人，請留番係屋企講，人地無興趣聽，更俾人知道左你既生意差不多已經到左極限～

計劃書

八月 7, 2007 in 創業紀與騙徒行傳

我唔明點解咁多人出黎做野／做生意，咁輕視一份計劃書呢？因為認為無用、浪費時間定唔識寫呢？我都見過有人連一隻字都無寫過，就可以「昆」人千幾萬，不過呢 d 係個別例子～ 唔係話大家夾份買條三 T 都要做份計劃書出黎睇下有無得玩，而係你想同人合作，人地要知道你搞乜，最好都係經過文字，一個人執行／獨資都一樣，有幾多人百份之百記得三個月前諗過乜？ 一份計劃書，最起碼應該可以將你個概念、目標、合作模式、執行方法、利弊、收支等等，用最簡單直接既文字表達出黎，話之你講到天花龍鳳都好，如果唔可以寫出黎既，你搞清楚自己個概念係乜未？ 今晚教左個朋友一份計劃書大約係點寫，佢得寸進尺話可唔可以幫佢寫埋，佢只係填番 d 數字上去，我話得，不過我要收番少少顧問費咯～ 「唔係麻？以頁數計，你咪重收得貴過幫人做份年報＜唔係最貴果隻＞？」 哥仔，做份年報只係執靚個 layout 同包裝，個客已經俾晒資料，你做設計出身就梗覺得設計最值錢啦，依家我由無到有幫你砌份計劃書喎？分分鐘你連最基本既數據都要我搵埋喎？唔怕得罪講句，做份年報唔駛執埋公司盆數丫？ 我只係收番你三幾千墨水錢同打字費好唔好？

Sell 屎

七月 22, 2007 in 創業紀與騙徒行傳

剛剛趕完一份新既計劃書，睇番個 blog ，原來我已經成個星期無 update 過咯～ 其實呢份計劃書唔係好長，但我就搞左好乜耐，除左我懶惰之外，另一個原因係我自己都唔係好相信裏面所寫既銷售方法。 咁你又寫落去？無法啦，因為有人認為咁既方法係有得 sell 既，我唔同意，唔同產品有唔同銷售方法，唔係樣樣都係搵幾個 Salesman 出去跑就有生意，大佬，有 d 野要「煲」既，唔通做紙紮鋪既就叫人拎個紙紮公仔周街宣傳？ 我唔係 Sales 出身，唔係好明其他人點諗，我朋友 Alfred 就認為件產品幾垃圾都有人要，係卦？ Sell 屎 Sell 屎 ！係因為「屎」先要人 sell ？定係一個成功既 Sales 就「屎」都賣得掂呢？

非友即敵

六月 18, 2007 in 創業紀與騙徒行傳

＂沒有永遠的敵人，也沒有永遠的盟友，只有永遠的利益＂ 你唔好彩勒，唔好怪我，而且為左幫一幫朋友，就算無著數都要「隊」你！

宜虛心

六月 15, 2007 in 創業紀與騙徒行傳

呢幾日唔係去左開會傾生意，就係要去教書，好似好忙咁，就好似我講過後面有舊大石碌緊過黎追住你咁，雖然錢搵唔倒幾多，不過有時傾下傾下，慢慢可以建立倒個新既網絡出黎，同埋學左一 d 新野，有時養兵千日，真係用在一「招」。 我越來越覺得個人既能力好有限，唔單止自己，好多幾醒既人都係一樣，做人，都係虛心 d 好，多聽少講。 所以之前「應科丸」有條傻四話佢地乜都識搞、乜都想搞，真係唔知俾乜反應佢，不過我呢 d 衰人，表情笑容都交足既，唔通拍檯走咩，話晒山水有相逢丫馬。 不過，佢地咁既人手，做埋 d 咁既野？真係唔識既嚇死，識既笑死！

應棍總監

四月 26, 2007 in 創業紀與騙徒行傳

應科院擬設營運總監一職 唔知又會請條乜水返黎幫手 fing 錢呢？跟住果幾年納稅人又要俾幾億應科院，用黎打擊香港中小企科技公司勒，例如鬥平搶生意啦～

製造富豪

四月 25, 2007 in 創業紀與騙徒行傳

承接上一篇，其實呢類「忽然係石頭爆出黎」既富豪，中港兩地真係唔少，係咁意介紹兩個俾大家﹕ 都係果句﹕如有雷同，實屬巧合～ 第一位係某本地品牌既老闆，一講代言人個名你就估倒係邊間，老闆以幸運出名，炒地產可以係大跌市前放晒 d 貨兼執倒唔少，成日中六合彩，做呢盤生意之前 d 錢又係唔知點黎。。。。。。以上係跟過呢位老闆既近身透露既。 第一位太普通勒，第二位明顯 d ﹕ 北方某一個省份有位人民代表實業家，以鋁業聞名，公司簡介為「老總高中畢業後，聯同某香港公司創立乜乜鋁業集團。。。。。。」，我唔知阿老總大人高中畢業後有無俾外星人擄走過，不過「某香港公司」就比較特別，特別在好低調，唯一可以同呢間公司有連系既新聞，就係「未完稅香煙」。。。。。。 比較起黎，湯尼陳既財富來源就清白得多咯，未聽過龔氏既錢同賭、毒、煙、北韓有關～

錢，等一陣就有

四月 23, 2007 in 創業紀與騙徒行傳

呢句我都識講，如果我有一大舊錢，唔駛擔心呢樣擔心果樣～

科研

四月 19, 2007 in 無序社會, R&D血淚史, 創業紀與騙徒行傳

好正經八百的題目名稱。 今晚新聞報道，審計處查數查到去應科院，出醜係必然，政府用納稅人既錢下海搞科研，你期望有乜出現？ 我係馬料水雛妓園「浦」過幾年，經常碰到應科院既「科研」人員，佢地既日常話題係搵工跳槽﹔我今日打左個電話俾一個係應科院既老友，問佢 re-org. 完未，佢全程食住零食答我，以我所知，佢地成 team 人返工咁耐，只係不斷 training …… 班友唔係唔識做野架，早期應科院係矽谷請左唔少好野過黎，不過係阿豬阿狗都做緊 0.18um / 0.13um 甚至 90nm 既時候，佢地只係 tape out 左一粒 0.25um 既 test chip ！點解呢？ 佢地七年「燒」左七億，行政費用佔左一半有多，剩低既三億，可以夠好多公司科研十幾廿年，佢地呢？唔好睇佢地網頁講到咁乜多成果，你又估下值唔值三億丫拿？佢地上次係 ITU 個 booth 就勁咯，成個場最重本既「書仔」非佢地莫屬，我都有拎本黎留念架，納稅人既錢喎～ 如果審計處＜或者財委會＞搵個行內有番咁上下年資既行家一齊去抄佢地家，保證係果三億裏面會重多醜事揚出黎！可以搵我，要我介紹都得～ 政府出錢出力搞科研唔係唔好，不過要「燒」多私人公司十倍既錢，先會有少少野睇，私人公司至少要向股東交代＜拎政府 funding 果 d 唔計＞，審計處？咪審完就無下文 。。。。 各位納稅人，肉痛嗎？ 雛妓園班懶人唔好偷笑住，下次輪到你地解釋下門口果一百幾十棵當年為左溫總同老董黎參觀而買既枯樹買左幾錢。。。。 *** 係度開個盤口，「雛妓園」一定唔止用左十八萬睇風水，你又估下點解？