FTP の悲劇

五月 26, 2008 in 蘋民生活, 軟件, 悲劇系列

近年使用 Mac 幾乎無涉及任何上下傳檔案，好多時都係打下文件、上下網，係 OS 8 時代反而比較多機會，因為當時公司唯一可通過防火牆上下傳檔案既電腦就只有部 Mac ，上星期因為要將大量檔案上傳，自自然然諗下有乜 FTP client 好用 本來我呢個 UNIX 人用 command line FTP 當然係如魚得水，但唔知對方個 server setup 係咪有問題，一掟得多檔案上去就痴痴地線，刪除唔得、覆寫唔得乜都唔俾做，咁我試過用其他幾個 freeware FTP client 都唔得，重要幾唔好用又有蟲蟲，至於對方提供既 web browser FTP 唔駛講就梗係廢到無輪 一肚火打去客服問，再彈去技術支援，佢地一定唔認有問題架，重介紹我用 Filezilla (open source) 話一定無問題，我話我用 Mac 喎，佢地即刻啞左！ 其實 Filezilla 係有 Mac version ，以前連 PC version 都未用過，試落覺得個介面太過 PC 化，除此之外各方面都唔錯喎

記憶咭の悲劇

三月 28, 2008 in Bosco, 蘋民生活, R&D血淚史, 悲劇系列

依家既記憶咭體積越黎越細，以下既危機只會越來越多發生～ 話說上個星期睇倒網上廣告，某硬碟製造商推出＂一換一＂優惠，可用任何硬碟、記憶咭加九九九元換購外置硬碟，本來我無諗住幫襯，但我都搵定張咭出黎，拎埋落腦場睇下係咪咁抵～ 咦？點解我放係 keyboard 旁邊既兩張 MS Duo 唔見左？得返個 card reader 同 Apple remote 係度，當時我真係「心念電轉！」，剎那間我已將前因後果組織起來，唔通。。。唔通。。。有人將兩張 MS Duo 插入左唔應插入既地方？即刻拎起個 card reader 搖兩搖，我耳邊響起「 short short 聲！」嘿嘿嘿。。。我既冷笑聲足以令在場人士如墮冰窖，不過現場只有一隻蚊！ 更恐佈既係後面，從「 short short 聲！」我分辨出裏面應只有一張咭，咁另一張呢？我又聯想到會唔會插左入去 iMac 既 SuperDrive 裏面呢？救命啊！依家輪到我如墮冰窖勒！ 我嘗試唔去諗最壞既結果，先拆開個 card reader 研究下有乜係裏面，咁對我呢個工程師黎講，拆散 d 野又無乜難度既，唉～天啊～點解裏面真係有張咭係度？點解個設計咁屎可以經 smartmedia 既位置插左入去裏面架？ 咁我再試埋個 SuperDrive ，嘿！好事成雙！插碟入去彈返出黎，極有可能裏面加左料啦～精彩既係我只係用一封書信，靠感覺靠撞「了」番張咭出黎，但唔知 SuperDrive 有無內傷呢？我聽日要買六合彩了～ 之前有陳靚太既教訓，我一早已係部 iMac 後面加左個 3M 無痕掛鉤黎防止波記上網時太開心而整跌，但細路仔百厭起上黎你就點都估唔倒，佢地同 d 頂級 Hacker 一樣，無孔不入！ 我開始擔心過多幾年波記會 hack [...]

點心の悲劇

一月 7, 2008 in 悲劇系列

幾個星期之前睇過 pcheung 介紹既叉燒包與菜肉包 crossover ，剛好係差不多既時間，我都有相同既點心奇遇記 果個星期日同朋友係愛民商場其中一間酒樓飲茶，咁我對飲茶一向麻麻地，落單叫點心就由其他兇狠既同伴負責可以啦 唔。。。第一轉點心已經黎料，擺係我面前有幾件炸過既餃子，上面淋左 d 咖喱汁，咦！？咁既造型唔通叫咖喱角？唔係，咖喱餃子至岩！既然你咁有型，我就要試下勒 唔試唔知你厲害，係你餃子既外表下原來係一件「山‧竹‧牛‧肉」！！！ 我真係流左幾滴汗～ 咁相比起呢碟「餃子」，其他點心都唔算太出奇既，只係味道麻麻﹔話咁快食完幾轉，兇狠既同伴投訴點解奶皇包走左單，哦？係咩？ 「唔係丫，我正話食左件淋左煉奶既饅頭，裏面有 d 無味既黃色物體，我諗就係你要既奶‧黃‧包勒！」 創新係好＜我覺得似亂黎多 d ＞，但係都要就住班客丫，我食得落沙蟲，但就接受唔倒餃子裏面係山竹牛肉咁搞野～ *** 唔怪得內地最近要無厘頭定立「國家標準」饅頭～

Demo の悲劇

八月 15, 2007 in 創業紀與騙徒行傳, 悲劇系列

請告訴我，如果閣下「嫌錢腥」，我不用再白花力氣下去～ 我不明白，用一個月時間預約的示範，竟然是這樣？當然，這是閣下的生意，我管不了，但請不要害我！ 今天應該很「慶」！

毛髮の悲劇

五月 18, 2007 in 無序社會, 悲劇系列

以下內容有描述性行為包括人妖、輪姦及人獸交，閱讀前請先為你的顯示屏幕帶上保險套，如仍感不安，請打爆你的顯示屏幕～ 以前寫過鬍鬚，前兩晚等緊剪髮既時候突然諗起體毛呢樣野，以香港華人黎講，我身上既體毛都算多過一般人少少，人就係咁賤，無既你就恨有，有既就覺得麻煩，體毛就肯定係其中之一樣，剩係冬天時著衫好鬼易俾靜電電親已經夠麻煩，而某 d 特別部位「死不悔改」地生出一兩條「怪毛」就更難受，好多時打完波係更衣室換衫，初相識既朋友想問又唔好意思既眼神，都幾似係睇緊一隻猩猩咁，唉！ 唔知由幾時開始，總會有人將呢樣野關聯到性慾果度＜甚至性能力＞，正如鼻既大小代表性器官既大小咁，唔知係咪同參孫有關呢？諗起都覺好笑，關乜事唧？最經典係六、七十年代果 d 特務、艷情電影，總有個男主角赤裸上身，心口一定有張「地氈」，救命～～～ 我可以話俾無毛又想「有毛有翼」既男仔聽，心口有張「地氈」真係唔係想像中咁好玩，而且港女唔多鍾意「猩猩」既，唔好再周圍問人點織張「地氈」勒。 我覺得香港男女都幾可悲下，唔少男女仍然對果 d 「一晚做幾多次先算正常？」「一次做幾耐？」「多毛=性慾強」問題充滿疑問，但個社會就越來越多重標準，一邊你可以係報紙檔買倒一本二本封面寫滿性暗示既八卦雜誌＜當然無包膠袋＞，大報既軟性內文就更明刀明槍啦，但另一邊個社會就不斷打壓一 d 討論丫、資訊丫，最正係個政府唔知係順手壓制言論自由而告夠你地，定係明知人地有錢請律師＜報紙、教會＞而唔卵告佢地，你會開始懷疑性呢味野係唔可以宣之於口既，性係唔乾淨既，兩公婆係睡房都要由頭包到落腳。。。。。。 我驚十年八年後，「夫婦結婚十年，始知何為性交，婦﹕哦！原來唔係接吻就有 BB 架？」呢類問題越來越多咯！ 我地既社會唔係推行性教育，而係自我奄割～ *** 好多好多年前，有朋友係外國帶左餅「人獸交」番黎，我知係乜，所以無乜強烈欲望要拎黎睇下，我連意外地 BT P2P 左「人妖／異獸戰」我都唔多頂得順既，不過我覺得呢 d 野有求就有供，總有市場總有人好奇既，不論 100P 、人獸、大肚婆、人妖、輪姦 呢個朋友未婚之前都有好多古靈精怪既性怪論，結左婚之後佢重正經過我喎！哈！ 沉迷呢 d 野唔係乜大不了既事，以為裏面既野係真既先係問題，以為講下睇下就會有問題先至係「問題」！ 睇番我之前既 post ， A&E 乜都有，你又告佢地淫褻丫！

萬有引力の悲劇

五月 2, 2007 in 悲劇系列

今晚當然有睇澳門警民沖突既新聞，我一路睇住果位司警向天開槍，一路諗住會唔會「乃」野，點知真係膠左～受傷果位無辜市民，就九成九係司警支「古惑的槍」所為啦～ 司警哥哥，請搵本物理書睇下，粒子彈係會飛返落黎，而且打得死人既！

Training の悲劇

四月 22, 2007 in 悲劇系列

見靚太呻老公超時工作再加上被逼參加公司團隊合作訓練，令陪伴家人時間大大減少云云～ 我是過來人，試過每月有百多二百小時 OT 紀錄，相信經驗比大部份人多，可以吹兩咀。 不過今次講同 training 有關既先，下次再教大家 OT 求生訓練～ 以前在美資公司工作，美資公司最著重員工陪訓，連「去公幹時怎樣使用公司信用咭」都有 training course 可上＜我真係被逼上過＞， training 唔可怕，可怕既係每一個員工每年都有一個最少訓練時數＜例如 40hrs＞，重要分 internal / external ， Internal 既即係 ISO / 6 sigma / TCS / IDE / 7 habits ……. 果類吹水野， External 既只要同工作有少少關係就得﹔每年一開始，你同你上司除左為你份 appraisal 努力之外，重要為你既 training plan 頭痛，一個新入職員工可能重會有唔少 course 可以上，做得十年八載，你就越來越為呢樣野而頭痛，唔通又再上多次 7 habits ？唔好卦？ 呢類 training 無聊在，明明係一 d 好普通好多人都知既常識，俾人放到好 Q 大、好 Q [...]

俾鬼迮

二月 16, 2007 in R&D血淚史, 創業紀與騙徒行傳, 悲劇系列

請恕我刻薄，但要同 d 「垃圾」客見面，有時覺得真係好似「俾鬼笮 迮」 上星期先被「笮 迮」完，個客正到呢！ ＜內容已被刪改，聲音經過處理＞ 客﹕「我有個好正既 idea ，不過你要答應我，唔好同人講喎！你話你做開，我又驚你偷橋喎！」我﹕「請、放、心！」客﹕「登登登登， USB 太陽能電筒！」我﹕「嘩！好厲害丫！」 Orz ，我個咀夠唔夠 “O” 型？交足戲卦？ 我﹕「咁，你咪話另外有個 project 差唔多埋尾，要我幫你做 project man. 既，你想點搞呢？」客﹕「係，其實都八八九九架勒，差少少唧～」我﹕「咁差 d 乜？」客﹕「其實想你介紹兩三個客俾我，最多事成之後分番多少俾你！」我﹕「咁多謝丫，等我諗諗～」 超你丫！幾時 project man. 要做埋 sales 果份？無客就無客啦，扮晒魚蝦蟹，老老土土咁！即係又無錢俾啦，俾你見倒個客，你重會聽我電話？ 「乜都有，係無客唧！」 – 好似變左金句咁！ *** 今日又有「神奇」客搵上門，約左聽日見面，希望唔駛「笮 迮」啦！我唔係性工作者丫！

情人節の悲劇

二月 15, 2007 in 悲劇系列

我呢個痴漢，係情人節好少送花，平日先玩送花，重係狂送果隻，無他，平時抵玩好多，而且情人節亞豬亞貓都有花啦～ 送花，其實好簡單，送禮物先傷腦筋，又要特別、又要有心思、又要人無我有、又要就住大家關係進展而送＜剛剛識既你唔會送大粒鑽介、睡前服、 T-back 卦？＞ 所以送禮物只會越送越刁鑽，有一年，我就試過做左一束玻璃做既跳舞蘭俾個女仔，因為佢好鍾意跳舞蘭，至於佢感唔感動，我就唔記得咯。 *** 講開情人節，有個舊同事有次都幾悲下 話說當年舊同事 CY 係怪人一名＜我又何嘗唔怪呢？＞，好難得先追倒個女仔，咁第一年一齊過情人節，一定要落足本啦， CY 人雖然怪，但唔係蠢仔，重係一個有錢仔，佢一早就係某名店定左一大束花係情人節送去人地 office 勒！ 到左正日， CY大安旨意等個女仔打電話俾佢話收到佢送既花啦，點知。。。。到左放工都未收倒花喎，原來間名店搞錯 order 喎！！！ 咁都得？咁貴扎花無話送完之後打番電話俾個客 confirm ？ * 我唔知當日 CY 點「死」法，但聽講因為呢單野而提早結束關係，而事後間名店又道歉又話幫佢再送過，有 Q 用咩！？ * 唔知各位男士多唔多送花，有無留意花店通常好好服務，莫講話打電話俾你 confirm 你女友收左花，連你送左乜花、點既樣都可以幫你影底寄番俾你做參考都得＜十年前已有，唔係依貓添＞ 我試過最搞笑既送花事件﹕因為事忙，打電話去一間未幫襯過既花店，叫佢送扎花去邊度邊度，話今晚先落黎俾錢，最後，花送左去，但送花位仁兄竟然向果位收花人收錢！ 大佬，你驚我唔找數咩？

Quota の悲劇

十一月 27, 2006 in 生活／感覺, 硬件, TV/Movies, 悲劇系列

星期五睇左壹仔內陳小姐之訪問，我對 iPod 既認識都係佢介紹既，而第一次見 iPod 係戲劇性地係飛機見旁邊一個日本人用緊，不過奇怪地，我從未擁有過一部 iPod ，正確黎講我連一部 MP3 player 都無！ 以我對消費性電子產品既深入認識，無一部 MP3 player 係手都幾奇怪＜唔通我係 洞穴 穴居原始人？＞，我唔係標奇立異，人地用我就偏偏唔用＜當然我都唔認為用 iPod 就等於型／潮＞，相反我覺得 iPod 係現時市面最正既 MP3 player 添！ 其實，係 iPod 未推出之前，我一直都想買部 MP3 player ，甚至當時已經有 harddisk 做儲存媒體既產品＜不過體積超大＞，不過到後來，我發覺自己係唔再需要呢一樣野，因為我聽歌＜家中聽歌不算，下有解釋＞既 quota 已經用得七七八八。 真架，人對好多野都有 quota ，例如煙、酒咁，你吸收得太多，就漸漸地唔多想再黎，又或者 quota 有限而越來越要求高，次一皮既都唔好拎黎浪費我寶貴既「餘額」！ 點解我會咁呢？係舊公司氣氛比較自由開放，容許員工返工聽音樂＜我真係見過有公司唔俾＞，而我工作既部門更放，有晒 high wall cubicle ，可以熄燈炸機都得﹔每日我返到公司第一件事就係繼續聽歌＜除左開會，返工、放工同家中都聽緊＞直到放工，一日聽十幾廿個鐘真係好平常﹔本來幾好架，因為多數工作都係一個人對住個 mon. 單打獨鬥，有音樂伴碟好似幾好喎。 但幾年來聽聽下發覺唔多妥，因為聽住音樂做野開始集中唔倒精神，有時聽一陣已覺煩悶，寧願同隔離同事吹下水好過，至於出街，咪啦，個街嘈到我連電話都聽唔倒，所以除左係屋企上緊網會聽下音樂，其他時間俾隻耳仔休息下好過。 初初我都諗住會用下 PSP 、 PDA 係街度聽歌睇戲，但我心算過，次數十隻手指數得晒 唔知幾時我既 quota 會 特 [...]

土筍凍の悲劇

八月 11, 2006 in 生活／感覺, 痴漢食譜, 悲劇系列, 人之患

呢個星期比較忙，無乜時間寫野。 今日係北角擺脫左班人＜定係佢地擺脫左我？＞，見上次食唔倒，可以去睇下有無土筍凍食，去到竟然有喎，咁我唔客氣啦，五蚊件，我一口氣買左廿蚊。 一試之下，唉，以前係紅磡果間食既土筍凍一樣五蚊件，但係有砵仔糕咁大件，呢間既土筍凍起碼細一半，裹面既沙蟲又少，連 d 汁都係無味既！頂！ 我相信唔會再幫襯呢間食店咯，上次服務又差，又唔係好食。過兩日再去土瓜灣試下另一間，再失敗的話，我諗不如自己整。如果有人可以成功介紹我去食，我會好感激佢。 呢排好多人搵我教書，我推左唔少，無謂觸景傷情。 我諗可以開個 Category 叫「悲劇系列」。

三號波、速食の悲劇

八月 3, 2006 in 無序社會, 生活／感覺, 痴漢食譜, 悲劇系列

我依家唔係一個正常既上班族，掛八號風球與否，對我無乜影響，我諗我可以比較持平地評論應否停工停課。 今日下午約左長毛及 Nelson 去東九睇鋪位，由新界出九龍，沿途都幾大風幾大雨，路邊有唔少吹斷左既雨具，所以我寧願著 GORE-TEX 外套﹔係九鐵上面，打左個電話俾朋友＜綽號﹕表叔＞，我以為佢係四川返左香港，點知。。。。。。原來飛機停飛令佢被困成都，表叔可憐夸夸問我香港係咪所有飛機停航，表叔啊表叔，我真係無睇新閒報導。 人大左，我唔會講掛唔掛八號風球，一定係受政治、經濟影響呢類不負責任既說話＜正如我唔會話六合彩有無人中頭獎都係馬會做馬＞，但係，我希望天文台重新檢討現時「熱帶氣旋警告信號」準則，維多利亞港內唔係好大風，唔代表其他地方唔大風﹔或者勞工處／大機構檢討下依家既停工指引，依家香港人唔係靠港內捕魚為生。 不過，維港咁大風都未掛八號，天文台唔俾人插到反轉至奇！去片！ 好勒，睇完鋪，去左一間叫做潮苑既茶餐廳飲野，三個人叫左凍奶茶、凍咖啡、凍檸茶、咸牛肉蛋治。。。，凍咖啡無味、凍奶茶無茶味、凍檸茶無茶味＜檸檬都無味＞、蛋無蛋味、麵飽硬而無味。。。唉？！ 好啦，到左夜晚勒，我平時好少幫襯快餐店，如非必要唔好搞我，但今晚無可奈何幫襯左大快活，一個焗豬扒飯，頂！大快活應該改呢個飯名做「焗豬肉乾伴生米」，痴線架，焗飯都整成咁！ *** 依家凌晨兩點，出面好大風，唔知表叔上左機未呢？本來想打電話俾佢，但係無謂浪費佢部手電既電量啦，等佢可以打下其他更重要既通話，佢係成都機場等上機已經好痛苦。

賣笑の悲劇

二月 20, 2006 in R&D血淚史, 創業紀與騙徒行傳, 悲劇系列

上星期去其中一個拍檔既朋友間公司賣橋，不幸地，我地果十幾條屎橋全被Ban＜我佔三數條＞，最後人地已經有幾條收係檯底，叫我地返去諗下有乜Solution，唉！原來人地要簡單野………咁又係，High-Tech 揩野，Low-Tech 撈野！ 無乜人知發明呢句金句既人叫David，我跟過佢一段短時間，佢除左神經質、狂燥、好色之外，都算係一個好老細，而且佢比大部份Marketer更有marketing sense，比好多Sales更勤力sale客，不過佢係做R&D既……. 補充﹕David有幾個好處，一＞佢知死，唔識唔明就會問人，不過信唔信就…….. 二＞佢知死，識死螺D客。三＞起碼知道市面有乜產品，跟住睇下有無得做，唔係下下閉門造車 ……………………….. 唔係講笑，呢D咁平凡既野係好多出黎搵食既人身上都搵唔倒，當然包括兩位舊老細﹕勁人Fred & Robert