老翻文化

九月 21, 2007 in 無序社會, 老翻文化

以下內容絕對係講完又講、又長又 X 既尿布文章，自瀆用，無誠勿閱～ 最近我先知道原來有人買樓時要求經紀將佣金以另一種形式全數回贈＜公司那份佣金當然不可能＞，而經紀又願意只係咬份＂老底＂喎？ 我唔係想知成個過程合唔合法，而係買家同經紀完全將＂服務／商品／交易費用＂零成本化，簡直係某 d 人心中既「烏托邦」啦，點解提供左服務，唔可以收取合理＜或者係之前協議定下＞費用呢？ 當然經紀可能因為再開唔倒單就俾人炒而逼住白做，但係乜野教育消費者咁既邏輯？以前買野講價人地開價二佰，你還價廿皮＜大陸 mode ，係香港會俾人追打＞，最後可能六十成交，依家唔係勒，一開口就唔駛錢～ 當我聽完以下既敘述，我明白晒﹕ ＂咩老翻丫，咩照抄丫，你個支玩具槍咪又係抄真槍，咪又係老翻，我再抄你有乜唔岩？＂ 乜道理？紙鶴係咪又老翻真鶴？ ＂乜你支野咁乜貴，我支老翻平過你、正過你喎！＂ 乜唔係免費咩？做老翻唔係開善堂咩？

香港，抄襲做假的天堂

七月 29, 2007 in 無題／耐人尋味, 老翻文化

即係老翻天堂、正版地獄啦！ 今日睇左靚太同 ReadandEat 介紹既新一輪「抄文」，今次比「奶周」更無恥，唔係為商業理由而抄，真係唔識俾反應，乜寫 blog 唔係為自己而寫？乜寫 blog 搞到好似要趕「死線」無稿出跟手上網搵 d 野黎抄？ 更更更更無恥既係後面﹕抄到有人俾個獎你，你重有面、有勇氣去拎既？我好佩服咯！ 佢面對苦主果 d 回覆就簡直係無恥到極點啦！我睇完都面紅丫，唉！ 「無奈的是，有很多精妙文字，我是記錄在案，卻從沒記下來自何方。我看你的似我，你看我的似那一個，其實也真是無可奈何～有時拾人牙慧，模仿一番，未嘗不可。」 「我無意把你的據為己有，只想把那僅有的抽取、過濾，來個借屍還魂，好令它更勝一籌！」 「若然有人真的如此識貨，把我的作品苦苦粉飾一番後才宣告面世，我一定會真心多謝對方，並虛心請教對方，希望能指出我的不足之處，指教何解還要花時間修改。」 「即使我 copy & paste，都未必會照版煮碗，我都有我性格。我是經過思考過濾的。」 嘩，我噴血咯～ *** 香港，甚至中國人既地方就係咁，乜都抄一餐，抄完再抄再抄上抄，總之重有丁點剩餘價值都要啃到盡，連 R4 呢 d 侵權產品都有人再抄襲做假既＜其實老翻市場生態就係咁＞，好似 d 低等生物咁咯，無野食就食同類架～ 見到上面既事件同「回覆」，我真係幾驚下，唔係驚自己俾人抄，坦白講我未夠班啦，只係「驚」呢個世界點解會變成咁？ *** 地鐵色狼非禮完個女仔後既回答﹕「即使我非禮左你，你應該感謝我如此識貨，更應希望我能指出你的不足之處﹔我更無意把你的全部據為己有，只想把你那僅有的身體抽取、過濾，令你更勝一籌！而且我都有我性格，我是有經過思考過濾既，你有無見過我非禮阿婆先？」

幾時有老翻＜二＞

三月 10, 2007 in 硬件, 老翻文化, 軟件, R&D血淚史

最近我幾鍾意聽一個網上電台既 podcast ，內容係關於 I.T. 既～ 佢地幾位主持對電子產品／科技應用既睇法同我有幾大分別，不過唔緊要，他山之石，可以攻玉，話唔定有野學倒呢！ 剛剛聽左佢地之前幾期既 podcast ，內容主要係 iPhone ＜係！又係佢！＞，其中一個主持係 Mac user ，另一個就扮演反對聲音，本來任何事情上都一定有支持與反對者，但我見倒一個現象﹕ M= Mac user A= 反對聲音 A: 「你講到 iPhone 咁好，不如你講下有 d 乜野 iPhone 做倒，其他電話係做唔倒既？」 M: 「例如 web browsing ，佢做到好似 desktop 上面咁既速度、效果。。。。。。」 . . . . . A: 「就算依家做唔倒，又有乜咁特別唧，你估人地半年一年之後出唔倒咩？。。。。。。」 [大意如此] 如果係一間公司既老細講以上既說話，我尚可容忍，因為自己公司既產品無創意，咪照跟人地咯，總好過無工開，但如果係一個用家講既，唉！創意何價呢？ 最緊要識問﹕「幾時有老翻？」 P.S. 其實佢地幾位主持對產品開發／軟硬件問題都睇得太簡單，如果 iPhone 上面既技術，只係單單用粒快 d 既 CPU ／快 d 既硬件就搞掂，咁就真係抵佢俾人抄勒！

幾時有老翻？

一月 21, 2007 in 無序社會, 玩物, 老翻文化

幾日前經過朋友阿龍鋪頭，坐低同佢吹左一陣水，佢慨嘆依家香港零售市場越來越唔好做，客人唔會考慮你件產品既創意、 labour cost 諸如此類，只係考慮你既成本價，相反歐美買家較注重你擺係件產品上既「附加價值」。。。。。。 阿龍係做玉石生意既～ 其實我話佢地考慮你既成本價已經好尊重你既產品，更多既顧客只係考慮三個因素﹕平、平。。。。。。最後都係平！最好係街邊碗仔翅既價錢，富豪飯堂天九翅既質數啦！ 「長毛」以前成日話做左野出黎就自然有人會欣賞，我就話戇居啦！無宣傳無網絡你「聽」坐艇再俾人抄十幾次啦！啊！唔係！係亞甲抄完你，亞甲再俾亞乙抄，亞丙亞丁亞戊又再抄亞乙，無日無之！依家個個都話去「鴨記」買老翻玩具、老翻電筒、老翻乜乜物物，賣「流蛋*」？ out 啦！ 就以賣漢堡包為例，係人都知麥噹噹係數一數二既。。。。。。唔好食，但邊個仍然企係度？連「啃得雞」都係睇通左，照抄麥噹噹個模式先有得玩落去＜啃得雞香港代理係壹仔度講既＞，一句到尾，不間斷而強勁宣傳加龐大網絡就係成功既因素，其實由我地為左「蝦佬契弟」而食麥噹噹開始，大家都認同左產品質素無所謂，有乜野送先係重點！ 依家既人見倒新產品，唔係問幾錢，係問﹕「幾時有老翻？」 *假錶