Archive for the ‘R&D血淚史’ Category
依家既記憶咭體積越黎越細，以下既危機只會越來越多發生～ 話說上個星期睇倒網上廣告，某硬碟製造商推出＂一換一＂優惠，可用任何硬碟、記憶咭加九九九元換購外置硬碟，本來我無諗住幫襯，但我都搵定張咭出黎，拎埋落腦場睇下係咪咁抵～ 咦？點解我放係 keyboard 旁邊既兩張 MS Duo 唔見左？得返個 card reader 同 Apple remote 係度，當時我真係「心念電轉！」，剎那間我已將前因後果組織起來，唔通。。。唔通。。。有人將兩張 MS Duo 插入左唔應插入既地方？即刻拎起個 card reader 搖兩搖，我耳邊響起「 short short 聲！」嘿嘿嘿。。。我既冷笑聲足以令在場人士如墮冰窖，不過現場只有一隻蚊！ 更恐佈既係後面，從「 short short 聲！」我分辨出裏面應只有一張咭，咁另一張呢？我又聯想到會唔會插左入去 iMac 既 SuperDrive 裏面呢？救命啊！依家輪到我如墮冰窖勒！ 我嘗試唔去諗最壞既結果，先拆開個 card reader 研究下有乜係裏面，咁對我呢個工程師黎講，拆散 d 野又無乜難度既，唉～天啊～點解裏面真係有張咭係度？點解個設計咁屎可以經 smartmedia 既位置插左入去裏面架？ 咁我再試埋個 SuperDrive ，嘿！好事成雙！插碟入去彈返出黎，極有可能裏面加左料啦～精彩既係我只係用一封書信，靠感覺靠撞「了」番張咭出黎，但唔知 SuperDrive 有無內傷呢？我聽日要買六合彩了～ 之前有陳靚太既教訓，我一早已係部 iMac 後面加左個 3M 無痕掛鉤黎防止波記上網時太開心而整跌，但細路仔百厭起上黎你就點都估唔倒，佢地同 d 頂級 Hacker 一樣，無孔不入！ 我開始擔心過多幾年波記會 hack [...]
呢本書好適合我朋友長毛同好多工程師睇～
今晚睇左「歲月風雲」第一集，講既係中國製造既汽車品牌將會征服世界各地市場，我眼中只係好似一套嘲笑緊內地製造業既電視劇，做下 OEM 裝配工廠整下 iPod 都重可以，自己開發？咪玩啦！紙皮餡肉包丫？ 唔信既人，你見過＂舂深＂既設計文件未？優點係格式、內容、連數據都可以小數後三個位相同於＂台乜電＂既，你話幾方便呢？
我呢個人，愛恨分明，喜歡的話，忠心不二，變心的話，嘿嘿！對人如是，對僱主亦如是。 *** 係我離開第一間公司，跳到「摩記」既頭一兩年，我應新老細 TS 既要求，將舊公司既部份較有經驗同事「撬」過黎，除左有獎金之外，我係有少少報復心理，當初我雖然走得瀟洒，但心中對舊公司總有點不忿。 因為有人通水既關係，舊公司一直清楚我既動作，我好感謝管理層係呢件事上既大量，我連一個電話都無收過，甚至我「策反」舊公司一個比較重要既職員﹕ G 君 「重要」既其中一個意思係佢比我更資深！ 當日既高潮係，因為舊公司剛剛升左 G 君＜加埋薪添！＞而令佢十五十六唔知走唔走好，星期六下午我走上舊公司，當時重有小半同事係度做緊野，管理層就係另一層辦公室隨時走入黎果隻，而我就係其他舊同事面前「大模施樣」走入 G 君既辦公室，關上門同佢傾左好耐。 我同 G 君分柝左唔少走既理由，我諗大約係「你係呢度無乜野發展既機會」之類，我俾時間佢考慮下，其實我都無信心＜升左又加左喎！＞，到左星期一 G 君終於下定決心！ G 君到今時今日都重係我朋友，佢好慶幸我「拉」左佢走出呢間公司。 *** 另一件事我一直好想寫低佢，裏面發生既詳情好多舊同事都唔知，令佢地對我有唔少誤解，甚至有人以為我幫左老細追女仔而上位，我不如趁呢一刻自己公開內情啦！反正所有當事人都不在其位勒。 當年係「摩記」做左一段時間後，覺得自己係公司既發展機會有限，同上司 KK 更理念唔同， KK 經常強調上司下屬要有和諧、親密關係，大家要好 friend 先方便做野，搞到成班同事放左工都要去埋 d 大家都唔 enjoy 既聯誼，我就成日都寸佢無聊，做得野你理得我放工劈酒定唱 K 丫？所以大家唔咬弦就一定啦！ 就連「撬」 G 君過黎呢件事，都可以令呢個小氣老細唔高興，事源請我番黎既 TS 已經唔係我上司，但我同佢都幾好朋友下， KK 當然唔高興啦，更唔高興既係後面， TS 要求我幫手搵個比較有經驗既人入去佢果 team ，目標當然係 G 君啦，等我搞得七七八八既時候， KK 同我講點解唔將 G 君介紹入我地呢邊，佢話佢都有 head count [...]
今晚「財經透視」訪問「富記」老總 Edwin ，有關回歸前後香港高科技發展～ 成十年無見，唔知佢係咪重係咁憎我呢？ 下一篇既下集，係同佢有關既，不過我未諗到點寫～
之前睇 AM730 CK 講下屬告狀，我之前做既一份工，都試過告狀，重係越級告狀添！ 老實講，我既出發點一 d 都唔偉大，只係唔想間公司衰，令我要搵過份工﹔話說我既上司 Robert 做野亂 Q 咁黎，硬膠地認為求其做 d 產品出黎就可以大賣﹕ 「件產品過唔倒測試丫？咪唔 test 咯，有乜問題？」咪又用股東＜納稅人＞ d 錢賠俾個客，我未聽過做生意要預左賠錢既 「唔 work 唔緊要，出得快咪得咯，最緊要拎倒個 feeling …..」拍唯美咸片咩？ 「粒 chip 無 ESD (Electro-Static Discharge) protection 有乜問題？」無問題，粒 chip 未上 PCB 就死卵左，有乜問題唧？死之麻！唔用安全套有乜問題 ……. 「Cap. 同 Resistor 點解唔可以縮細？我地賺唔賺倒果錢，睇你個 module 縮倒幾多勒！」嘩！聽講個 module 佔幾個巴仙咋喎，不如掉左佢啦，縮 resistor ？TSMC 份 design rule reference 講明唔同 resistor 既 min. width [...]
好正經八百的題目名稱。 今晚新聞報道，審計處查數查到去應科院，出醜係必然，政府用納稅人既錢下海搞科研，你期望有乜出現？ 我係馬料水雛妓園「浦」過幾年，經常碰到應科院既「科研」人員，佢地既日常話題係搵工跳槽﹔我今日打左個電話俾一個係應科院既老友，問佢 re-org. 完未，佢全程食住零食答我，以我所知，佢地成 team 人返工咁耐，只係不斷 training …… 班友唔係唔識做野架，早期應科院係矽谷請左唔少好野過黎，不過係阿豬阿狗都做緊 0.18um / 0.13um 甚至 90nm 既時候，佢地只係 tape out 左一粒 0.25um 既 test chip ！點解呢？ 佢地七年「燒」左七億，行政費用佔左一半有多，剩低既三億，可以夠好多公司科研十幾廿年，佢地呢？唔好睇佢地網頁講到咁乜多成果，你又估下值唔值三億丫拿？佢地上次係 ITU 個 booth 就勁咯，成個場最重本既「書仔」非佢地莫屬，我都有拎本黎留念架，納稅人既錢喎～ 如果審計處＜或者財委會＞搵個行內有番咁上下年資既行家一齊去抄佢地家，保證係果三億裏面會重多醜事揚出黎！可以搵我，要我介紹都得～ 政府出錢出力搞科研唔係唔好，不過要「燒」多私人公司十倍既錢，先會有少少野睇，私人公司至少要向股東交代＜拎政府 funding 果 d 唔計＞，審計處？咪審完就無下文 。。。。 各位納稅人，肉痛嗎？ 雛妓園班懶人唔好偷笑住，下次輪到你地解釋下門口果一百幾十棵當年為左溫總同老董黎參觀而買既枯樹買左幾錢。。。。 *** 係度開個盤口，「雛妓園」一定唔止用左十八萬睇風水，你又估下點解？
最近我幾鍾意聽一個網上電台既 podcast ，內容係關於 I.T. 既～ 佢地幾位主持對電子產品／科技應用既睇法同我有幾大分別，不過唔緊要，他山之石，可以攻玉，話唔定有野學倒呢！ 剛剛聽左佢地之前幾期既 podcast ，內容主要係 iPhone ＜係！又係佢！＞，其中一個主持係 Mac user ，另一個就扮演反對聲音，本來任何事情上都一定有支持與反對者，但我見倒一個現象﹕ M= Mac user A= 反對聲音 A: 「你講到 iPhone 咁好，不如你講下有 d 乜野 iPhone 做倒，其他電話係做唔倒既？」 M: 「例如 web browsing ，佢做到好似 desktop 上面咁既速度、效果。。。。。。」 . . . . . A: 「就算依家做唔倒，又有乜咁特別唧，你估人地半年一年之後出唔倒咩？。。。。。。」 [大意如此] 如果係一間公司既老細講以上既說話，我尚可容忍，因為自己公司既產品無創意，咪照跟人地咯，總好過無工開，但如果係一個用家講既，唉！創意何價呢？ 最緊要識問﹕「幾時有老翻？」 P.S. 其實佢地幾位主持對產品開發／軟硬件問題都睇得太簡單，如果 iPhone 上面既技術，只係單單用粒快 d 既 CPU ／快 d 既硬件就搞掂，咁就真係抵佢俾人抄勒！
之前提過，年廿八搵上門既新客，我相信都幫唔倒佢勒，因為我問過我地既技術顧問 CK ＜叫得＂顧問＂即係唔係公司內既人啦＞，連佢都話根本趕唔切 re-design ，現成既 solution 又唔岩用，而且相信其他人都無乜計咯，唯有向個客「投降」啦！ d 唔多明白箇中道理既人又會出黎問三問四﹕點解唔踩通霄幫人搞掂佢唧？ 咪天真啦！工程師唔係乜都識做，我地間公司名亦唔係 ACME – “A Company Makes Everything” ！ *** 新年就一定要去拜年啦，去姑丈度拜年既時候，姑丈「娥」左我幾句﹕ 「你大個仔啦，屋企盤生意都係你既，好應該返去幫手。。。。」 我無駁佢，反正呢 d 時候講道理係無用既，我最多當聽歌啦～ 類似既問題，過年前大妹問過我，我分析左利害、講得好清楚俾佢聽，佢好同意，希望佢會間唔中向有關方面表達下～ 屋企盤生意係代客加工，相比起一件「產品」既其他部份如開發、設計、銷售、售後服務，「代工」呢部份 value 唔高，但競爭就好大下，要靚、要快、要平、數期要耐、要「迮」原材料、要好關係網絡。。。。但唔係賣知識為主！ 我唔會話呢盤生意無利可圖、無前途，但要更上一層樓好難，「守」得住亦難！ 各位反駁我之前請諗諗 OEM / ODM 有幾好搵先， TxMC / F0xc0nn / Flextr0nics 呢 d 公司既成功唔係必然，投資大、風險高，做唔倒行內既頭幾位，你都幾「杰」！ 我重想搏一搏咯。。。。
請恕我刻薄，但要同 d 「垃圾」客見面，有時覺得真係好似「俾鬼笮 迮」 上星期先被「笮 迮」完，個客正到呢！ ＜內容已被刪改，聲音經過處理＞ 客﹕「我有個好正既 idea ，不過你要答應我，唔好同人講喎！你話你做開，我又驚你偷橋喎！」我﹕「請、放、心！」客﹕「登登登登， USB 太陽能電筒！」我﹕「嘩！好厲害丫！」 Orz ，我個咀夠唔夠 “O” 型？交足戲卦？ 我﹕「咁，你咪話另外有個 project 差唔多埋尾，要我幫你做 project man. 既，你想點搞呢？」客﹕「係，其實都八八九九架勒，差少少唧～」我﹕「咁差 d 乜？」客﹕「其實想你介紹兩三個客俾我，最多事成之後分番多少俾你！」我﹕「咁多謝丫，等我諗諗～」 超你丫！幾時 project man. 要做埋 sales 果份？無客就無客啦，扮晒魚蝦蟹，老老土土咁！即係又無錢俾啦，俾你見倒個客，你重會聽我電話？ 「乜都有，係無客唧！」 – 好似變左金句咁！ *** 今日又有「神奇」客搵上門，約左聽日見面，希望唔駛「笮 迮」啦！我唔係性工作者丫！
以下係我既「原子彈炸烏蠅」全記錄﹕ 試過係舊公司用部 NeXT 只係拎黎收 fax 同 print fax 部 Mac 試過只係用黎 ftp file ……. scan 晒成本寫真集，再用 42″ plotter ……. 人地用 IDE ，我買家用機就 SCSI HD + SCSI CDRW ＜呢個玩過未？＞ 晨早買過＂萬五轉 SCSI＂，不過好快熱死左！ 成班同事用 SUN 打炸彈人、 ACM flight simulator ～～～未能盡錄，我現在誠心悔過。 不過我都有「用到盡」既﹕ 用部 PDA phone 裹面既 Excel 做 cost estimation ，面前既兩個廢人老細驚嘆﹕「乜電話都可以做倒？」低能仔！
前一排聽電台節目，主持人邵家臻同嘉賓討論而帶出幾個問題，其中一個﹕ 知識／技能是廣好＜大概是周身刀無張利＞還是深好＜只專門研究一兩門學問＞？ 當然，又廣又深最好，但豈能盡如人意？ 其中一位嘉賓講得明白﹕「唔係咁多張刀唔得，如果得果一張刀，又無人搵，咪餓死？」＜大意＞ *** 係我技工生涯中，有四份一時間係用左黎掌握／運用一種知識／技能＜或者係一個工序＞，而呢種知識／技能係呢一行裹面識＜真係識做果種＞既人唔多，係香港更少＜相信都係我認識既＞，因為書本／網上關於呢方面既資料唔多，通常一句起兩句止，公司內部更無任何參考文件，要學就要靠口耳相傳！？ 「口耳相傳」係真既，當年要靠混熟一個美國同事後，再由佢傳授俾我地。 唔係誇大，我竟然聽過有公司係用全人手制作架＜即係錯既機會大左，因為人會＂支力＂＞，而我舊公司係用半自動方式，思考部份由人負責，電腦就負責進行唔需要用腦但好悶好容易錯既部份﹔兩種做法所要消耗既時間比例，前者係用手畫一幅＂天星鐘樓＂既畫黎留念，後者係用相機！ 自從無係呢個崗位工作後，呢種知識／技能只係我既 resume 上一項無乜人識或者對方自以為識既野，而且呢個工序已經＜通常係＞俾代工生產商做埋，所以以前去見工， interviewer 從來唔考慮呢一 part ，更唔會問，一係佢唔識，二係無用！ 但係上年一次 interview 中，其中一個 interviewer 竟然明白我係 resume 寫乜野！重讚嘆＜或者係驚奇貼切 d ＞香港竟然有人識呢一樣野！ 雖然最後大家都傾唔埋～～～ 我唔係十年寒窗苦讀無人問，而今日終遇伯樂，而係終於證明左我自己堅信既野﹕ 一＞「識」左就係自己既，人地拎唔走，你可以好有信心話俾人知，你真係有實際經驗，而唔係老作，更肯定比人地做得好！ 二＞小知識都有大學問係裹面。 三＞人地扮唔倒，可能人地上左幾個 software training 就走出黎也文也武，但～～～內裏分別，有料既人係分得出既，無料既人明唔明你會介意咩？＜當然無料既人佔左人口一大截，而且我都重有少少介意＞而且睇得明相機說明書，講得出點影相又點？等唔等於識構圖呢！邊樣重要呢？ 求知既路就係咁孤獨，不過我唔需要人地認同我，我先有價值。 *** 究竟思考力重要，定記憶力重要？ 以前見過有同事走去「背」＜背誦＞公司裹面既設計參考資料，我想問，有咩用？ 資料係死既！ *** 本來呢一篇係想講下王穎呢個女仔，講下講下，好遠～～好遠～～
看呢兩日「人在中環」，上司對下屬既「補水提前解約」一定唔好受，我以「其他下屬」既身份睇下呢件事﹕ 好耐以前，我仍然係第一間公司做既時候，有兩位同事以不同理由要求「即走」，第一個係一個老細好睇重既同事 Tony ，大家同事之間感情重唔錯添，某日我放完假返公司，其他同事通知我 Tony 因家事問題，向老細要求提前解約，重話之後立即飛返英國老家！ 我無再同呢個同事聯絡，情理上我都傾向相信呢件事係真既，希望啦！ 第二次，我已經唔記得呢位同事叫乜名＜都唔值得去記！＞，呢位同事係各方面都係「走精面」，teammate 都唔多願同佢合作果隻﹔有日佢同老細講，因為移民關係，要立即離開香港，講真，我同拍檔 MayMay 都唔會覺得唔捨得，因為呢位同事返左工唔耐，但就幾乞人憎！ 無幾耐之後，我係學校＜當時我正進修呢！＞碰到呢位同事，之後既兩年都見倒，原來我都移左民，重同佢讀埋同一間學校添，幾咁有緣丫！ 係果一刻，我覺得呢位同事影衰我，咁既大話都講得出！？重要係碰到面，俾人拆穿左果種衰衰既笑容！
尋日睇 AM730 ，「人在中環」講「我點解要請你？」，我覺得有趣想講下。 作為 Interviewer ，我從來唔問呢個問題，因為叫得佢上黎既都係覺得佢合適既老手，臨場表現唔係太重要，而且 Interview 得半個至一個鐘，最多咪兩個鐘，好多野都可以扮，甚至有「求職工具書」教你，所以慳番。 至於見工，俾人問過好幾次，次次我都無特別準備，比較特別既係我人生中既第二份工。 Interview 果陣人事部既姐姐都係咁問，我俾左個無乜人會答既答案佢，佢打左個突！但我既解釋佢好滿意，因為我符合左公司既文化，咁當然請左我啦！＜其實之前已經見左未來上司，我知我表現幾好，見人事部只係循例＞ 大家有無興趣估下我點答？有人玩就今晚開估，唔好估得太複雜喎！ P.S. 呢篇文其實尋晚打左，「禁」錯掣又乜都無晒！而且原題目為「我點解要你請我請你請我？」 *** 噢！無人估，唯有開估啦﹕ 好簡單，三個字﹕「我夠懶！」
我懷疑某「人」一直生活在烏托邦＜或者自己係老闆，用說話催眠其他打工仔？＞，彷彿忠忠直直就一定前途光明，例如認為開會最有用，又或者只要態度積極，老闆就一定會賞識云云。。。。 小弟服侍過唔少老闆，有真正出錢既大老闆，又有只係打份工既老頂，用我手指加腳指數過，真正「賞罰分明」既老闆少之又少＜已包括其他人既老闆＞，而呢類老闆，亦好容易係辦公室權力鬥爭中被「搞掂」，因為佢相信「公平」二字，而天真地以為人地會公平對佢。 你可以話我「厚黑」，但升職、加薪從來都係老闆最後既手段，要獎賞下屬，有大把方法，要出動到真金白銀傷公司荷包，係下下之策！ 不過，要點係「有才華、有價值就有機會升職」？真的嗎？各位打工仔向上望一望，有邊個老細有才華？佢地最多人有既除左「運氣」之外，就係排除萬難、佛阻殺佛既「野心」，無呢股向上爬既「野心」，就一早投左降跳槽轉工啦！ 你都可以話「野心」就係態度積極，但係我眼中根本兩回事。 車！你個傻佬有乜資格教人？哈！都係糖衣吸引 d 既！ powered by performancing firefox
-
最近的回應
darkman on 我點解要你請我？ ARIEL on 我點解要你請我？ 人人檸檬茶(204篇) — … on 檸檬茶短篇 五點 on 倪匡先生真跡 My Life as Open Sour… on Hitler finds out no camera in … Five Points on 十五片 darkman on 唉鳳與雪豹 gabefung on 唉鳳與雪豹 darkman on Bosco 週記＜二十＞ darkman on 唉鳳與雪豹 -
Flickr/Sushi
More Photos 
MacGrass- Macworld
- Engadget
- 老地方冰果室
- An error has occurred; the feed is probably down. Try again later.
- Xuite日誌：反微軟資訊新聞
- 貝哥哥
- Tom’s Hardware Guide
- TG daily
- The Unofficial Apple Weblog (TUAW)
-
-
本 著作 採用 Creative Commons 姓名標示-非商業性-相同方式分享 2.5 授權條款授權.
This work is licensed under a Creative Commons Attribution-NonCommercial-ShareAlike 2.5 License. -
