韓信點兵

3 四月, 2008 in 痴漢食譜

「韓信點兵」其實同點菜無關！學生哥不要經 Google 大神入黎睇左就信以為真！

以前已寫過類似既題目，等我先補充一下﹕

1. 元蹄做得好，就是人間極品，肉，一定要肥才好吃，怕肥，豬排牛排肥雞肥叉燒小肥羊大不了燒熟才把肥膏「去勢」，吃，何必自虐？瘦叉瘦扒不若吃雞胸！
2. 羊油豆腐仍未嘗過，但我不怕，我連羊腿也會自家燒來吃，嘿嘿～

關於點菜﹕

1. 有次跟老友「表叔」、「牛肉湯」走進一間做日本菜的小店找吃，點菜通常是我的工作，他倆都不會費神在這事上，我蓋上已看過的菜牌，向侍應點了幾道菜，菜式全都不在菜牌上，但都是從菜牌中的菜式中變化出來，過了良久，侍應從廚房面有難色地跑回來，當然做不出來啦，可能廚房內的師傅也沒吃過，那個年頭，真的手足齊全的都辦日本料理，反正客人吃不出來～
2. 很怕點了菜而喜歡的那道菜永遠不來，記得一次在黃大仙一間小店吃飯，大家已吃得差不多時，仍有一道菜未送上，追問侍應，當然又是面有難色啦，留意到其他客人也是一樣的問題，聽到跟侍應對答，都是較難弄的那道菜不見了，再看刀功，都不像一般的切法，原來是三位太太創業，不用說很快就結業咯～
3. 最喜歡的，是點菜時經驗老到的侍應會打斷你，告訴你﹕「夠了，你們吃不完，吃不夠試試甜品。」

飲食加零一

18 三月, 2008 in 痴漢食譜

看到讀食寫的飲食101，覺得好玩，做一次文抄公，不過大家習慣大不同﹕

1. 不喜歡吃餅乾，不過要吃餅乾來打發時間的話＜例如 OT＞，多數吃威化餅。
2. 喜歡吃麵，有湯無湯也吃。麵要配雲吞水餃，河粉要配腩汁。
3. 喜歡吃牛筋，但不能太淋。
4. 喜歡吃雪糕，但不吃雲妮拿，其他味道無問題。
5. 不喜歡吃牛肉乾、豬肉乾和雞肉乾，亦不喜歡吃豬肉鬆，因為很容易嗆喉，但喜歡吃豬肉鬆壓成的＂貓屎＂。
6. 以前很喜歡去買不同的酒回家試喝。
7. 喜歡別人用手剥開橙皮給我吃，不喜歡將橙切開來吃。
8. 不吃蘋果。
9. 喜歡吃提子，有核的亦可，但不可太酸。
10. 喜歡吃芒果。
11. 喜歡吃榴槤，味道真的很臭，正！
12. 不喜歡煮飯，只煮＂食送＂。
13. 不大喜歡吃薯條，怕手指上的油漬加鹽漬，懶清潔。
14. 帶紙巾上街，因為除了太太，以前身旁的女孩都不帶。
15. 吃飯時用左手拿起碗，右手拿筷子，雖然我慣用左手。
16. 吃完飯如食物夾在牙縫裡，用牙線牙簽就地正法。
17. 吃西餐時，只用刀叉。
18. 不怕吃整條的魚，我是「魚見愁」。
19. 吃全隻雞時，愛吃雞腿雞軟骨甚至雞尾對上的位置，但不喜歡吃雞胸。
20. 喜歡啜骨頭，尤其做咸豬手時。
21. 午膳完畢，最想睡午覺，如果可能的話，例如搭巴士。
22. 夏天喜歡喝凍飲，例如利賓納。
23. 四至五小時一餐，很少吃零食。
24. 以前家中會儲存即食麵和急凍餃子，以作不時之需。
25. 吃雞蛋喜歡吃煎，生吃也可。
26. 牛扒要四成熟，很怕太熟的牛肉。
27. 吃壽司或刺身時不喜歡塗芥末，一定要日式吃法，最怕港式「紅毛泥」- 豉油加芥末一起攪。
28. 吃完飯後有胃氣，無法！
29. 不吃魚蛋豬皮，只吃牛雜。
30. 不喜歡吃糖果。
31. 喜歡吃豆沙燒餅。
32. 喜歡吃糖水。
33. 喜歡喝酸梅湯。
34. 不大喜歡喝老火湯。
35. 都說不喜歡煮飯，只煮＂食送＂！
36. 不大會包餃子，元寶型已是極限。
37. 喜歡吃燒雞或燒鵝或燒豬的腿。
38. 吃乳鴿。
39. 也吃蛇。
40. 兔肉？四腿沒腿我也吃，連蟲也吃。
41. 不喜歡吃辣，但近年多吃了。
42. 不喜歡吃薯片。
43. 太愛喝酒，但不太愛喝啤酒，近年喜歡＂雙蒸＂。
44. 喝咖啡，但近年已少喝＜以前一朝早四杯＞，不想喝港式奶茶。
45. 不喜歡喝汽水，有酒精的有汽飲品除外。
46. 不喜歡吃忌廉，只愛黑森林蛋糕。
47. 做菜只放鹽、油。
48. 如果想起要吃某種食物，告訴身旁的人，之後不了了之。
49. 喜歡一個人看電影，但不喜歡一個人吃飯。
50. 吃完飯後很少吃水果。
51. 不覺得人家點的菜比自己的好吃，畢竟，會吃的朋友不算多。
52. 怕用公筷，因為常不自覺地將公筷拿來用＜哈哈！以前我們要被罰請客～＞。
53. 最怕人家請自己去吃喜宴，因為菜式不好吃，我亦不打麻將，太悶了。＜好吃的菜式太少，懂吃的主人家更少＞
54. 一直想找土荀凍吃，味道仍記得很清楚，但很難找，亦不好吃。
55. 小時候不喜歡吃蠔豉，現在亦不覺得很好吃，我最愛海「鮮」。
56. 隨身帶備薄荷糖，讓口氣常保清新，但多數被人吃掉。
57. 喝湯吃麵時一定有聲。
58. 為什麼要邊吃東西邊講電話？
59. 如食物包裝上有「內含花生」字樣，一定照吃。
60. 不喝阿立克、阿華田，我喝冷熱飲品多數不加糖。
61. 吃意大利薄餅，但討厭意大利粉。
62. 吃蛋撻會先吃皮，才吃中間部分。
63. 很少塗果醬，多數塗花生醬。
64. 喝檸水時，不會完全搗爛檸檬，怕太酸。
65. 不喜歡吃瓜子，根本不好吃，所以從不會浪費時間在剝瓜子這事上。
66. 第一次有女人親手剥龍蝦我吃時很興奮。
67. 去派對只為吃，當然！
68. 跟朋友吃飯，最喜歡有人負責點菜，如果他／她識點菜的話。
69. 很怕買生日卡和訂蛋糕，因為我只知自己喜歡什麼，去猜度別人喜歡什麼太麻煩。
70. 小時候什麼也不喜歡吃，現在。。。。
71. 很喜歡香草的味道，令我胃口大增。
72. 不會喝水，只喝茶。
73. 去朋友家吃飯，不想下廚，亦不會去洗碗。
74. 很喜歡客人自動自覺洗碗。
75. 在大公司工作的時候，同事都很喜歡我。。。。買回來毒害他們的零食。
76. 劏雞劏魚，絕不手軟，但未打過蛇，好玩否？
77. 不喜歡去燈光陰暗的地方吃飯，除非跟美女去吃。
78. 港式燒烤，一人一隻叉很好玩，但亦很麻煩。
79. 上床前會喝很多很多的水，不怕半夜上廁所。
80. 每次吃完勁辣的東西都會肚瀉，但誰不會？
81. 不喜歡外出吃飯。
82. 喜歡自己帶飯回公司吃，但一個人吃太悶～
83. 煮即食麵時會將煮熟的麵和熱湯分開上。
84. 剝完的蝦殼我不想浪費，但沒時間再煮成湯底。
85. 很喜歡吃菇類，除了毒菇。
86. 去飲茶時會叫水仙香片，因為岳母不喜歡喝。
87. 家裏有很多茶葉，用來給我喝。
88. 我不買任何廚具，我已手中無刀，心中有刀，嘿～吹牛皮我最了得。
89. 吃完芝麻糊／墨汁意粉不會去廁所漱口，嘴唇黑黑很好玩。
90. 以前做菜不會看食譜，現在則沒有時間看食譜。
91. 中菜食譜可以沒圖，但日式食譜則要求有圖，因為不懂日文，西式食譜呢，我愛看名廚電視節目。
92. 小時候不喜歡吃魚，但現在我是「魚見愁」。
93. 先喝湯，才吃飯，調轉次序，亦可。
94. 家中各人吃飯的座位已定下，尤其是波記，不能亂坐。
95. 別人煮飯時我不洗碗；我煮飯時也不是我洗碗。
96. 吃飯時間很長，因波記不愛吃飯。
97. 吃完飯才看電視，同意。
98. 平時的早餐是麥片或麵食，趕著出門就買麵包。
99. 不愛吃港式方包，粗麥包才是至愛。
100. 想吃白粥作早餐，不過無人煲，自己又經常忘記睡前煲。
101. (希望)大喝大吃也不胖。嘿嘿，我也是。

外加﹕

1. 很想再吃新鮮即劏的豬肉、豬潤
2. 很久未有自己做刺身，食材在自己手上仍然跳動的感覺很特別
3. 很想學好中國菜，先由客家菜開始
4. 剛剛看了韓國電影《食客》，不錯～
5. 近日又手癢想做雪糕，你喜歡什麼味道？

辣、快「罵媽」！

29 九月, 2007 in 痴漢食譜

我幾乎吃不得辣，但又心思思想試，記得第一次吃水煮牛肉同大千雞就一路「好辣」一路食，一路俾女友罵我神經～

而且太辣我都會「皇恩大瀉」呢！

最有趣一次在韓國公幹，在工廠飯堂排隊食午飯，最好味的兩款午餐＜其一是意大利薄餅＞已售罄，只剩「血紅」咖喱雞跟另一款清湯撈飯，韓國同行提醒我不要選清湯撈飯，因為太辣我一定受不了，我只好選咖喱雞啦

XYZ ！那個「血池地獄」咖喱雞除左十分辣外，幾乎沒有雞，每件只有手指頭大，而且差不多全是雞骨，太過份勒！我唯有向白色餐桌上唯一的裝飾品 – 辣醬與泡菜「攻擊」啦，因為唔飽，我用辣醬撈左一大碗飯！

最後我個嘴腫左成日！我心諗點解唔試下「清湯撈飯」？那碗清湯只有幾條豆芽，會有幾辣呢？

我看著坐在對面的韓國同行，佢塊面血紅色、好似一幅瀑布咁「落水」！！！＜佢重係一路食一路抹汗、一路＂嗄嗄＂聲～＞

自此，我都食得少少少少辣～

喜喜

3 八月, 2007 in 生活／感覺, 痴漢食譜

我幾欣賞喜喜既叉燒。

今日五點幾經過喜喜，諗住食個叉燒切雞米再去做野，坐左一陣叉雞米重未到，就見倒羅老板走入黎，我向佢揮左幾下手，佢都掛住同人傾計，似乎睇唔倒我喎！

好啦，我心諗咁咪唔駛同人應酬咯，即刻 dup 低頭「扒」碗叉雞米，「扒」完重拎部遊戲機出黎打，打左一陣就有隻怪手伸過黎「扒」左我張單～

唔駛諗都知係隻怪手係邊個啦，我抬頭同佢講﹕「乜咁客氣丫？」

羅老板﹕「咁緊係啦，趁呢餐平平地丫麻！」

咁又係，你老哥請親我食既都係魚生，其實呢位羅老板係賣魚既～

***

倦，真係好倦！每晚上上下網都「恰」眼訓～

趕鬼入、趕鬼出

7 六月, 2007 in 痴漢食譜

上星期喉嚨痛到想死，，星期四晚同 Desmond、Jimmy、Addie 食晚飯，話明喉嚨痛唔想食咁辣，但最後都幾辣下，生蝦又好，炒飯又好，好 Q 辣！

跟住返到屋企飲左兩大碗湯，第二朝竟然好左六、七成，哈，以毒攻毒真係得既～

甜酸苦辣咸

21 五月, 2007 in 痴漢食譜

下晏無出街，淥左剩麵做午餐，我都幾鍾意食麵，一口氣食左三碗不同味道﹕

糖醋麵 – 好味

辣麵 – 食完糖醋麵，見倒有包不知名辣椒油，相信係唔知邊包麵既配料，其實我唔係好食得辣，辛辣麵已經係極限，不過見紅紅地，心思思。。。。辣得我丫！

冷麵 – 剩左一碗喎，去雪櫃＂巢＂左支冷麵汁出黎，唔，掃埋～

麥記至尊漢堡

28 三月, 2007 in 痴漢食譜

上星期六食過，有讚有彈﹔麥記既 fans 唔好介意，麥記既產品我好少讚，唔彈咁多已經係一種進步～

痛恨麥記既亦唔駛插，睇落就知﹕

首先，個包裏面既生菜、蕃茄，比平時新鮮、好食，呢 d 野先係人食架嗎！塊酸瓜都好食左！

個汁較得幾好，酸度剛剛好！亦配合其他配料既味道～

塊漢堡似樣過平時，起碼有牛肉味又無乜渣＜好低要求姐！＞，平時果 d ，咬落我覺得好似溝左 d 報紙碎咁，記住，用黎買包果 d 錢，可以買倒好多報紙，重唔駛排隊添～啊，唔岩，依家有三份免費報紙喎！

要彈既一樣就夠，又話「多汁」， DLS ！邊度重有汁，我唔那覺有 juicy 既感覺喎，要有多汁既感覺好難咩？加少少沙律醬都有效果啦！有人話蛋白都得，我就未試過唔肯定～

鍾意食漢堡包就自己學下整啦，唔難架，麥記 d 野 邊係人食架 浪費寶貴既 quota 啦！

有人話塊漢堡牛肉有 10mm 厚喎，你有無眼花？

***

原來好耐無寫痴漢食譜，上一篇係三個月之前咯！

腎腎地

25 十二月, 2006 in 痴漢食譜, 不一樣的回憶

上星期整薯餅食，其中一個薯仔竟然係「腎」既＜老人家話 d 根類蔬果，煮左好耐、煮極都係好似生生地咁爽口，就叫＂腎＂左＞，搞到我以為整唔熟，其他就煮得太耐，吹脹！

有無通曉植物、農作物或者廚藝既高人話我知點解根類蔬果會「腎」左？

***

前兩日打邊爐，食左一條不知名大海魚＜學名不詳，街市魚販稱為＂懞仔魚＂，熟左口感似＂油甘＂，但頭部形狀不似＂油甘＂，較扁平＞既魚扣、魚肝。

我食左幾啖先醒起唔知條魚既內臟有無＂雪卡毒＂！？

唉！＂雪卡毒＂要一兩個鐘頭先有徵狀，一件污、兩件穢，繼續～～～

＜屋企既觀眾唔好學，我曾受過訓練，而且，起碼我知中＂雪卡毒＂係點！＞

個魚扣好爽，比石班扣更正，同普通魚扣唔同，呢個「扣」勁有魚既鮮味！

個魚肝重正，好滑，好似豆腐咁滑，一樣勁有魚既鮮味！

***

因為所謂「毒魚」，搞到我呢排無鯇魚食，鯇魚唔係我最鍾意食既淡水魚＜最多第二＞，但當你乜野魚都無得食既時候，鯇魚就係寶，佢平、靚、正。

鯇魚、綾魚係我家鄉順德大量出產既魚，老一輩既順德佬認為品賞鯇魚應該係「魚生」先係王道，你無睇錯，係七十年代以前，香港街頭有唔少「七彩魚生」*既招牌，賞過新鮮「草鯇」魚生既我承認，的確係幾好食！

第一次品賞「七彩魚生」，係八九年「六四」之後﹔細個既時候，爸爸同伯父輩成班順德佬係屋企圍埋切、切、切，再撈、撈、撈，永無我地班小朋友份。

「六四」之後幾個月，我陪爸爸回鄉辦理祖屋等事宜，當時內地氣氛依然緊張﹔到「±步」後既脕餐麻麻地，當晚因為太太太多蚊而訓唔著，兩點就起左身，同趕完墟返黎既叔伯去村口飲茶，呢間茶居只得一千零一款點心，登～登～登～登～～～就係蒸排骨勒！因為成條村主要係養豬同養魚既！

飲完「早茶」無覺好訓，訓醒巳經差不多十一點，伯父已經開始準備一條草鯇做「刺身」勒，除左切魚、去骨、起肉，重要準備籮白絲、薑絲、蕎頭。。。。等，而我除左負責食之外，就係去祖屋後面買支自製雙蒸米酒。

跟住，我地三個就將 d 材料加埋生油混埋一齊，再用筷子撈呀～撈呀～，就係咁，我就食左第一口既魚生，依家我已經形容唔倒有幾好食，只係記得條魚好肥美，每一片魚都切得幾大片，同埋支雙蒸好香「純」。

第二次食就係近年回鄉祭祖既時候，爸爸同呢位伯父已經唔係度，切魚既亦都唔係同姓既自己人，唔知係咪條魚細條，佢切到 d 魚好似肉碎咁，好恐佈丫！媽咪就話係佢刀法唔好，重警告我地以後唔好食，因為唔識切一定有寄生蟲，我無得搭咀，因為叔伯父過左身之後，家族裹面最叻起鯇魚片就得媽咪呢個東莞人，而我只係識做日本刺身。

＜爸爸切魚片有好多骨，成日俾媽咪寸佢係唔識切魚片既順德佬！＞

諗諗下，真係要向媽咪請教下順德傳統鯇魚、綾魚、生魚製法，唔識釀綾魚肉，起碼都要識整生滾魚片粥丫！

*「七彩魚生」係星、馬等地仍然流行，係新年意頭食品，取其＂撈起＂意思。

昌勝軒結業

28 十一月, 2006 in 痴漢食譜

搵「昌勝軒」而搵到入黎既朋友，好抱歉，相信此店已因業主加租而結業！

如有進一步消息，必會通知大家！

powered by performancing firefox

又係中央飯店

22 十月, 2006 in 痴漢食譜

中央飯店已經成為我家既食堂，上星期又食左一次，無乜特別菜色想寫，反而有個現象我發覺越來越常見。

果晚我地點左一味「荔芋香酥鴨」，中央飯店係用一片燒鴨放係一舊芋泥上酥炸，因為媽咪認為食肆用既鴨係唔新鮮，所以我家外出用膳甚少「叫鴨」，所以我都唔知「荔芋香酥鴨」係咪用現成燒鴨整，而唔係用生鴨調製再烹調。

我諗番起上個月同二妹光顧旺角火車站旁新世紀一間東南亞風味食肆，二妹指定要點紅咖喱鴨，好勒，紅咖喱鴨上桌，我一試就問﹕「點解係用燒鴨整？」二妹肯定之前試過唔係用燒鴨呢！

其實用燒鴨做食材有一定方便＜生鴨調製時間較長＞，但係會唔會失去左菜式既原本特色呢？

易牙？妙手？再戰中央飯店

12 九月, 2006 in 生活／感覺, 痴漢食譜

上星期六同 TS 聽完所謂講座之後，去左幫襯「易牙妙手」，真係無估錯，除左紅燒排骨麵比較似樣，其他？唉！

就好似我叫既「炸豬扒」定食，咸到唔識形容，神經架。

尋晚又去「中央飯店」，掂！不過今次無送紅豆沙。

去「中央飯店」之前，係青山道附近行左一陣，無黎一排，好多地方都唔同左，連「德貞中學」都改左做「培道中學」。

封喉毒藥

24 八月, 2006 in 痴漢食譜

今晚我終於「有幸」親身試倒武俠小說中成日出現既封喉毒藥。

有人今晚煲左一煲好多材料既湯，包括﹕烏雞、淮山、杞子、龍眼肉，瘦肉、海蔘等等，我飲左半碗，喉嚨好唔舒服，我好俾面，我飲多半碗，幾乎出唔倒聲。

喉嚨好癢好涸好辛苦，之後唯有飲罐可樂黎中和佢，根據「毒手藥王」自爆，可能係落多左海蔘喎。

乜海蔘咁恐佈既咩？咁點煮海蔘架？

怪談之「一菜兩食」

21 八月, 2006 in 痴漢食譜

你試過一個星期之內，去同一間食店，同原班人馬坐在一檯，吃一模一樣＜相同度八十七巴仙＞的菜式嗎？

這星期我經歷了這樣的兩個瘋狂夜晚，星期三是「飲」！星期天是「食飯」！星期天亦正是今晚！！！

我沒有選擇逃避，我選擇是「面對」這「矛盾」，甚至今天我已預計今晚晚飯菜式是「翻炒」，所以我做了兩個偉大決定﹕先跟朋友吃晚飯「打底」，再故意遲到，只吃果盤。

首先，第一個偉大決定導至我多吃一個難吃的晚餐，第二個偉大決定再失敗，我遲到半小時還未上菜，天啊！更失敗的是早到者仍是點那個偉大的十二人套餐！！！天啊！

天啊！吃其他菜式有什麼問題？

現在我可以為「瘋狂」二字找到更深一層意義。。。

土筍凍再出擊

14 八月, 2006 in 痴漢食譜

今日有事要到土瓜灣一趟，完事後跑到美景街找土筍凍，不幸地，該店星期天休息，殘念～～～

你可能想問﹕「土筍凍真的這樣好吃嗎？」，對不起，土筍凍像啫喱，裹面還有一條絛沙蟲，不加醬料的話，還沒什麼味道。

「俺喜歡古怪！可以嗎？」

平日很少跑來土瓜灣，為找吃跑來土瓜灣更少， 反正土筍凍放假，就選落山道的金樂粉麵餐廳試試，選這店只因為其他店子外觀沒什個性。

進店打開菜牌，推介的是豬手跟牛尾＜不是牛鞭！＞，我從不相信茶餐廳的推介，不過既然來了，就點一個「豬手河」。

豬手比想像中好吃，份量也夠大。

回家後看網上食評，原來這店口碑不太好。

Related Topic: 土筍凍の悲劇

中央飯店

13 八月, 2006 in 痴漢食譜

奮鬥左成日，今晚 尋晚同屋企人出去食晚飯，本來媽咪提議去試下北河街街市大排檔，但係出發前媽咪話不如改去昌勝軒，我反建議不如去中央飯店試下，最後媽咪都話想去懷舊下。

中央飯店，據稱開業四十多年＜四十七？＞，我地都有二十年未去過＜好耐以前有個親戚每次擺生日酒都係中央飯店＞。

今晚 尋晚我地點左四道菜，分別係﹕鹽焗雞、東江豆腐、大良炒鮮奶、紅燒圖蹄，四道菜我地以前係其他食店食過好多次，呢次就試下佢掂唔掂。

鹽焗雞，我認為比起同區既昌勝軒，佢既鹽焗雞賣相不算太好但有雞味，而且昌勝軒既雞比較嫩滑＜都有雞味＞，上檯前重會熱一熱隻雞，等你覺得更好食。

東江豆腐，中央飯店用既係布包豆腐，有豆味，但係我對呢道菜無研究，無乜意見。

大良炒鮮奶，無得講，太子鳳城一定整得好食過佢，不過中央飯店平好多喎。

紅燒圓蹄，整得幾好，又平，但我好懷念銅鑼灣泉章居既紅燒圓蹄，唔知係食好味定食感情呢？＜果一次係我要入院做一個眼部手術，竟然大陣仗到全家人出動，最後去銅鑼灣泉章居食完晚飯，先辦入院手續＞

評語﹕價錢較平，招呼好，但係菜色要再試多幾個先有結論，暫時小輸於昌勝軒。

P.S. 旺角泉章居無做紅燒圖蹄，雖然餐牌有，但新鋪開張時我問過，而且，旺角泉章居越來越唔好食。

P.P.S. 中央飯店既梅菜扣肉下次一定要試，剩係睇個樣都知，整得好過昌勝軒！

***  中央飯店既紅豆沙 OK 喎！