拜托

22 六月, 2007 in 勁人回收筒

唔該，對近代電腦／互聯網歷史不熟識，就不要吹水！

「沒有微軟，根本不會有今天的Internet盛世。試想想，是誰讓每個人的桌面上都有一部PC？」什麼屁話？？？

如果這邏輯成立，咁香港微軟甚至全香港電腦用戶應該感謝我，我係一九九四前後 upload 最多 Win95 build xxxx ＜外加多套軟件＞上 BBS 俾人 download ，無左我係咪香港無今時今日咁多人用電腦上網？

三十年前無微軟呢間公司，呢個世畀可能會好大分別，好左或者差左無人知，但講到咁誇，不如話互聯網係微軟發明？

我用左 StarOffice / OpenOffice 咁多年，但始終唔可以唔用 MS Office ，點解？就係因為台積電 TS MC 既 order form *一定要 MS Office 黎填，用 OpenOffice 唔得丫！呢個咪微軟既偉大咯～

* 近兩三年唔知，因為無再 order ，但呢個係台灣公司既常見問題

***

老一輩？我咪香港互聯網既伏羲神農？

忌冷血

16 六月, 2007 in 勁人回收筒

今晚食完晚飯，過左去跑馬地飲野，唔好以為我好得閒＜前一個 post 咪話好忙既＞，其實係工作一部份。

搭地鐵去到金鐘站轉車，剛剛登上列車就聽倒「砰」一聲重物撞擊聲音，跟住就有人圍埋去，我埋到去既時候，已經有位男士扶起果位暈低既乘客，咁我就問左佢幾句，佢似乎唔知自己點解暈低左，咁當然唔可以俾佢自己離開啦，跟住就有人向車長同月台既站長報告勒。

由我埋到去既時候開始，旁邊就有個操外地口音但流利廣東話、四張幾既女士，不斷講﹕「搵人拉佢落車啦，其他人趕時間架嗎～」，起碼講左五六次，直到站長上左車都重講緊！

我同果位男士對望左一眼，大家係心裏面問候左佢娘親 N 次，我唔趕時間？你最趕！

福佳多謝晒

28 五月, 2007 in 勁人回收筒

多謝你，提醒大家，已經係六四屠殺十八週年

http://plastichk.blogspot.com/2007/05/blog-post_1617.html

輿論壓力？

12 五月, 2007 in 無題／耐人尋味, Web2.0, 勁人回收筒

「巴黎希爾頓」被「重判」，係自找既，關乜輿論壓力事？因為輿論壓力而「做」佢？因為負面新聞多而「做」佢？

唉～支持唔住～

***

中大單野，初初我都以為好嚴重，跟住睇落，超！一個所謂問卷咋喎，只係表達左一部份大學生對性既睇法，有乜問題？

「你最想同咩動物做愛？」就係鼓吹人獸交？我問你有無諗過召妓？我就一定係馬伕啦～

我地真係退化緊，遲早人獸交、雜交、茹毛飲血架啦！

好朋友、壞習慣

27 三月, 2007 in 勁人回收筒

亞輝係我其中一個幾要好既朋友，我以前講過，朋友至緊「好」，而唔需要大家好好朋友，佢都幾好既，但係，佢 d 習慣有時真係激到我彈彈下～

佢老人家做政府工大把假，間唔中就放下，或者行開行埋唔係位，但佢最鍾意自己唔係果度就將電話「飛」去果度，明明放假，做乜 Q 「飛」返 office ？你又要我 call back ，咁又點 Q 樣搵你？

另外，自己唔係屋企就咪「飛」返屋企啦！我情願你唔開機等我留言好過，你 d 同事／家人幫接你咁多電話，你都好意思既？

＜題外話，以前識個朋友，打親電話黎係你未拎起電話之前，佢都會將你呢條線 hold 住，佢就去左聽第二條線或者做其他野，你一拎起電話就剩係聽倒音樂，等一輪你先知係乜水搵你，你係咪咁忙先？你既係時間我既唔係丫！＞

另一樣亞輝既「好野」就係硬頸，次次約我係中環等，次次都話置地對面，但其實果度係交易廣場、怡和大廈對面，我問你係咪我既舊公司對面＜怡和大廈＞，你又硬係話唔係，以前同你係果度食過咁多次飯，你唔會唔知卦？

雖然置地同交易廣場唔係距離咁遠，但都唔好咁整蠱我丫～

不帶走一點雲彩

15 十二月, 2006 in R&D血淚史, 勁人回收筒, 不一樣的回憶

看呢兩日「人在中環」，上司對下屬既「補水提前解約」一定唔好受，我以「其他下屬」既身份睇下呢件事﹕

好耐以前，我仍然係第一間公司做既時候，有兩位同事以不同理由要求「即走」，第一個係一個老細好睇重既同事 Tony ，大家同事之間感情重唔錯添，某日我放完假返公司，其他同事通知我 Tony 因家事問題，向老細要求提前解約，重話之後立即飛返英國老家！

我無再同呢個同事聯絡，情理上我都傾向相信呢件事係真既，希望啦！

第二次，我已經唔記得呢位同事叫乜名＜都唔值得去記！＞，呢位同事係各方面都係「走精面」，teammate 都唔多願同佢合作果隻﹔有日佢同老細講，因為移民關係，要立即離開香港，講真，我同拍檔 MayMay 都唔會覺得唔捨得，因為呢位同事返左工唔耐，但就幾乞人憎！

無幾耐之後，我係學校＜當時我正進修呢！＞碰到呢位同事，之後既兩年都見倒，原來我都移左民，重同佢讀埋同一間學校添，幾咁有緣丫！

係果一刻，我覺得呢位同事影衰我，咁既大話都講得出！？重要係碰到面，俾人拆穿左果種衰衰既笑容！

回憶總是風流的

5 十二月, 2006 in 勁人回收筒, 不一樣的回憶

之前好多人都寫過人在中環，甚至人在油麻地，我諗我都可以寫下。

人地可以係「國金外望」，當年既我係「外望國金」，我既全海景 office 正正就係國金二期後面，由 office 望出去，國金二期係完全可以將個海景斬開兩邊﹔零一年睇住佢起，佢未起好，我公司已執笠！

返中環係我果行係一個奇蹟，同行既辦公室通常係大埔、沙田、九龍灣、官塘一帶，係日本同行先會係老尖有辦公室，我話俾舊同事聽返緊中環，個個都「嘩！嘩！」聲。。。。

係一大串「嘩！嘩！」聲過後，返中環對我黎講係壞處多過好處，首先，所有舊同事、行家、 vendor 、甚至一條 USB cable ＜其實電腦補品一定有，不過灣仔一定平 d ，同埋我想去灣仔食晏＞都唔會係中環出現，想搵人飲杯野都好麻煩。

其次在於無靚女睇，好多人以為＜或者好多中環男人自己幻想＞日間既中環有無數著住名牌高跟鞋周街走既 OL ，現實係無論所謂靚女既出現比率同水準，都比其他區低好多，呢個係我同 sales 同事既結論，唔好以為我地來來去去果幾個地方活動所以無野睇，查實每日午飯，我地都曾踩盡中環每一處食晏，無論係闊太飯堂＜連外賣都試過＞、樓上住家飯、「蛇竇」、國金快餐、日韓料理、皇后戲院果汁鋪、上環「煙格」，都唔多見有靚女，唔通靚女們用晒 d 錢買名牌而餐餐帶飯？

另一個美麗既誤會係海景 view ，維港內空氣質素之差，只會令人覺得身在雲中而唔係身在中環，基本上如閣下辦公室層數較高，唔好話睇清楚對面既老尖，大部份時間連附近地面上既物體都睇唔清楚，所以我無帶過任何女仔返去 office 睇煙花，因為九成貨不對版！

而比較打擊士氣既係，返「中環工」等於無啖好食，我返工既地方係中環心臟地帶，食個「走鬼、無味」海南雪雞午餐都要四草幾，似樣少少既＜包括味道同女侍應可觀度＞一舊左右啦，所以我地每日都會有咁遠行咁遠食晏，就算食個「腸蛋公」做午餐都走去上環，或者落灣仔食車仔麵。

除左去闊太飯堂外，要數最神經果次午飯一定係陪老細「狂人 David 」去銅鑼灣食海鮮，係周圍檯檯客都食午餐碟頭飯既午市，我地三個＜重要係搭檯！＞又龍蝦、又青班、又乜又物，咁折墮，我真係驚俾人打！係呢次之後， David 收歛左。。。佢改左係 Jarden house 樓下搭的士去油麻地食海鮮！不愧為香港電子工業界神經佬！

講遠左，其實我真係唔明有 d 人咁恨返中環，「誇」到低 d 人工都要去，為乜？

***

以我經驗，中環人唔少都係假大空，九一一前有次我同一個「賓卡」係佢辦公室傾野，過程中佢不斷地借頭借路都要 show 下佢都識「董正爬」同「梁咁蟲」，又人地張卡片又乜又物，咁同我地傾既野又有乜關係呢？

以後有人同你吹「中環經驗」，你可以叫佢收皮！又或者叫佢收皮之前，拉開佢件老西睇下佢著既係咪好似粵話片中既新馬仔、鄧寄塵一樣既「兔女郎」恤衫，大笑完再叫佢收皮！

***

呢一排好忙，以上一篇之前寫左一半就停左，起碼有幾篇係咁 …….

師弟

16 六月, 2006 in 勁人回收筒

1. 近日江湖傳聞既笑話中，除左漿糊同樹獺去某官方背景機構見工外，當數師弟同舊同事G君爭工做既笑話，話說全行有呼吸、有脈搏既人都知G君已經疊埋心水係黑太陽七三一審判日之後去某官方背景機構返工，而轉左工作性質六七年既師弟竟然走去同G君爭，重係一次要見人地兩份工，傳聞人地問佢究竟想見邊一份工，佢條粉人竟然同人講邊一份人工高，就做邊一份喎，痴線！
2. 師弟係未轉工種之前，工餘讀左個應用物理碩士返黎，之後好高調同人講，自己有master唔應該再做d低三下四既工作＜大意＞，不幸地，某官方背景機構既offer，係低三下四工作中既低三下四，只係跟住個designer，做下module仔，師弟啊師弟，我同人地傾你要既呢一份工既時候，講到明唔會長期做呢個job，短期幫下手就絕對無問題，因為我係出面係幫老細手搞個design center，搞下new product (end-product) development，至少都做top-level integration丫，乜你咁可憐？
3. 師弟，霍金黎左香港幾日，有無搵你交流下，你話晒都係物理學家丫？
4. 師弟，你知唔知G君好怕同你再做同事，第一，佢無興趣同你講應用物理，第二，如果你再叫佢做師兄，佢會好肉麻。
5. 另一江湖傳聞，除左某官方背景機構＜AsXXX＞外，政府既V乜C，同馬料水化學動物園都會一齊用納稅人既錢搞design services，政府左手、右手同細佬＜老二＞打交，一定好睇！
6. 舊老細話政府痴線，我就好贊成佢地搞，等佢地搞淋個市，橫掂出面design services個價鬥到咁賤。

今日蘋果。。。

2 五月, 2006 in 硬件, R&D血淚史, 勁人回收筒

Steve Ballmer 談蘋果

Haha!……

我除左笑，諗唔倒有乜更好評語，最好笑係。。。係人都知IPod唔係乜野驚天動地、空前絕後既新發明，但係咁又點？從來大賣既產品都唔需要乜野新發明，只係人地諗倒＜你諗唔倒＞將各種現有技術轉一轉、重新配搭就可以賣得。

傻仔CEO，我又問下你勒﹕

1. M$上一次有創意既產品係幾時？乜有咩？
2. IPod出既時候，我夠睇得通呢條水有得做咯，如果唔係舊老細同你一樣咁高，舊公司分分鐘上左市添，所以話呢個世界有好既idea都要有好既老細配合，M$呢類公司有咩＜是旦一樣＞？
3. 另一個例子，當初預言手電會有Mega Pixal鏡頭既高人我都識佢，但係又點？你有咁既馬都唔代表你係伯樂，低水平既老細有咁既胸襟、視野咩？呢d高人咪要走咯。手電加相機一d新發明、新技術都無架，咁你諗倒有乜勁野未？

MBP散熱膏過多引致過熱？

邊過教你地咁用散熱膏架，你估多就係好？

新廣告，Get a Mac，我比較鍾意Restarting同Network。

法老王說

30 三月, 2006 in 勁人回收筒

睇倒小麥草地一篇有關微軟 CEO Steve Ballmer教仔既報導，使我諗起一個勁人﹕法老王Fred Law

Fred係舊公司DragXXXXip的現任CEO<之前為COO,負責sales & marketing>，在我服務該公司時期，Fred創出不少名句:

1. <邊度有人打機架？>，話說有一業內數一數二既遊戲機配件製做商，對我地其中一新產品甚感興趣，只要略為修改就可用在一隻遊戲機手掣上，最後偉大的法老王以無有人打機同埋我地件新產品唔係市場標準為理由，唔做！如果法老王無講大話，佢三個仔都幾可憐，同其他小朋友少左個話題。佢三個仔無得打機事少，我地公司就係咁無左單大生意，大家都知Sony一年賣唔少PS2主機，手掣做到1% market share都賺到笑。＜呢句說話同Steve Ballmer講既如出一徹: I’ve got my kids brainwashed: You don’t use Google, and you don’t use an iPod.＞
2. ＜實掂！呢件產品，十個客，十一個等緊！＞，每次法老王諗埋D垃圾project，跟住叫我地計算成本同埋project schedule，都會講呢一句，依？咁我地咪好多客？你放心，法老王到最後又有另一個句，睇埋下面﹕
3. ＜唔得！遲一日個客都唔要！＞，無論要你砌架模型車又好，砌架穿梭機都好，schedule都係一個月，多一日都唔得﹔好勒！萬一你真係一個月內做得完，唔知點解，個客都會唔見左。＜唔得！貴一個仙個客都唔要！＞，同樣道理啦。
4. ＜好既Idea唔一定要做！＞，哈哈哈哈！咁係咪濕＜Sharp＞既Idea先做呢？
5. ＜我好鍾意D電腦慢，睇住D野慢慢出黎，好得意！＞，每次開會，佢要開佢部廢柴notebook做presentation既時候，我地都聽倒呢句。
6. ＜我最憎D越做得既人，越俾人針對！＞，佢講既係我地呢班旦散批評佢既好拍檔Robert，係！係我地唔岩，我地唔應該要求Robert做D正常既野。
7. ＜你要唔要買車？＞，你唔駛＜卒＞眼，你無眼花，當有新人加入呢間公司，最快的話，係新人未返工之前就有offer，如果大家岩傾，分分鐘用公司錢俾個車位你擺住架車先，你無估錯，法老王屋企賣二手車既，佢老哥讀書時代已經向同學兜售二手車，不過，通常買家同佢交收之後就唔會搵倒佢勒！嘿嘿！
8. ＜MPEG4 video呢D野係電腦上面先有喎！＞，法老王最有興趣開D唔賣得既project黎呃funding＜註一＞，有一次，佢又開個無無謂謂project，好勒，做到咁上下，阿公果邊有位外行既阿叔黎audit，睇完demo，阿叔問﹕＜點解唔做複雜D野？例如MPEG4咁？＞法老王﹕＜MPEG4 video呢D野係電腦上面先有喎！＞阿叔﹕＜唔係丫，我呢部手電都有喎，DV/DC都有MPEG4架？＞法老王﹕＜…………………….＞，當然，只要交足文件，錢一樣照批。

最搞笑一次係我離開舊公司之前一段時間，法老王經常假傳客人聖旨，又將我地R&D同客人之間既溝通block晒，好勒，有一日個客黎左同我地開會，發覺點解個客講既野唔同法老王講既野，不過，最正既係﹕客人之前email左一份參考資料俾法老王，法老王話睇左，但係會議室裹面客人面前打開部Notebook，佢完全開唔倒果份參考資料，因為果個係ZIP file，但佢唯一果部電腦上係無任何WinZip之類既軟件，開唔倒係正常既！我唔係會議室裹面，睇唔倒大家既表情有幾精采。

註一﹕有部份funding係產品量產期先要開始還錢，如果唔賣得，嘿嘿！袋袋平安咯！其實有唔少公司都係咁，反正駛既係你地納稅人既錢。而且，唔理個project有幾低能，最緊要你識幾多人！所以最好你係喇叭仔啦！因為只要你識人，就算你份建議書得一張紙，無內容都批。或者，只要將D唔等駛既野砌埋一齊＜例如用腳食飯加埋用手行山＞，而審批班人又未見過就得＜依？用腳食飯都得喎！＞，之前見過有人將Winamp好多年前放棄左既野，重新包裝過又得左。

Related topic:勁人

勁人

22 二月, 2006 in R&D血淚史, 勁人回收筒

講勁人，唔可以唔提Robert.…

傳說中＜至少有兩三個人聽過＞佢係某DD既頭馬＜某DD來頭不小，八九十年代為舊公司設計不少產品，係呢一行亦薄有名氣，出名有料，炳人亦有一手＞，咁當年見佢係香港插旗開公司，我又無著落，咁就大家一拍即合，跟住先知點勁﹕

一＞做左大半年，開始發覺佢有問題，佢對整個設計工作唔多熟，咁佢係CTO唔識做好簡單，請人做咪得咯，但係佢又要用自己方法自已黎，死勒！D產品出黎勁多Bug又無Reset，件野係某種情況下會永遠一睡不起，要掉去填海。

二＞所謂頭馬傳說，原來係誤會，原來佢條粉人累舊公司賠左唔少錢俾個客，之後每一份工唔超過兩年＜我發覺我開始都係咁……. ^_^!＞

三＞好勒！自從沙士之後，佢老哥一個月只會有幾日係香港，所有有關無關既野都掉黎我度，大老細＜另一勁人＞成日走埋黎問＜點丫？…….你知咯何？…….＞頂！條粉人一句都無講低喎，連要做示範俾董凸手睇都唔講低＜呢單野勁搞笑，將來再講＞，大老細係一日之前又走埋黎問＜點丫？…….你知咯何？…….＞

四＞佢既設計可能係藝術品，唔可以design for production，testing cost永遠超高，但我地又發現佢自己係大陸開班教人做design，課程裏面重有佢最唔熟既analog design！

五＞發現佢將公司既機偷龍轉鳳！一萬樓下都偷？痴線！

六＞懷疑佢收人錢﹕佢條粉人話我個project schedule太長，要out-source俾外面做，好勒，有同事做完evaluation，出左report俾所有人講明out-source既成品完全唔合規格，佢重死撐係小問題，當然佢堅持一定要快快俾錢！

七＞佢野野design evaluation都係咁意，一個module係四個generation出現過，但從無試過，不過佢就同大老細講無問題，好勒個module要用勒，就屈個DM幫佢改，咁當然唔可以係schedule裏面見倒，DM唔肯，即炒！

.
.
.
.
.
.
.
.
.

我慶幸，已經唔係呢間公司既員工！
＜下次再講法老王Fred＞