不專業

30 六月, 2008 in 戇鳩, 人之患

呢兩個星期參加左一個課程，講者有幾位醫生同其他專業人士，個課程好唔好見人見智，起碼有一大堆資料掉俾你，我真係無乜野意見，對以上人士既表現亦覺得 OK

不專業既係負責示範既幾位導師！

我已經為呢幾位仁兄諗埋借口﹕我都相信呢次示範係臨時拉伕既，而且幾位九成九應該係 RN 出身＜一睇手勢就知！＞，對呢方面既技巧生疏少少我都預左……

但都唔 X 係咁 X 流丫？幾位連最基本既手勢都做唔掂又錯又漏，講解亦唔見得有料到，但幾位係呢方面既＂導師＂喎！唔 X 係咁就去教人丫？連我教出黎既人都無咁水～

四個 station 有兩個係咁，浪費時間，唔示範好過！我都係第一次見倒呢 d 外行示範俾內行睇既＂慘劇＂﹔唉！我都教過前線既人，最起碼，人地服我呢個＂阿蛇＂～

肥左佬

11 十一月, 2007 in 生活／感覺, 人之患

上星期實習衰左，抵架，懶丫拿，排期再黎啦

重寫 blog ！？

串爆

14 九月, 2007 in 人之患

呢個星期都無寫 blog ，除左無乜野想寫出黎，其實係忙住今個星期去醫院上課既準備，呢個課程既內容無乜特別，只係教我用另一個教學方式去教授差不多既技術，同埋就對象就更專業化＜聽講會有醫生，救命！＞，不過要準備既事前功課就超多咯！

最憤憤不平既係，筆試竟然拎唔倒滿分，重要係答錯之前另一份試卷又答錯既同一條，俾人串爆！

誤解

24 八月, 2007 in 人之患

今日同友人食晏，講講下講到 Keynote ，佢話上次學校份功課取得最高分，但就俾其他組既同學投訴，因為友人該組因為使用 Keynote 製作 slide 才擊敗其他對手，哈？！

Keynote 比 Powerpoint 超卓唔駛我講，我都明白失敗者總要搵個借口，不過呢個理由唔多成立咯，你無內容你用乜軟件都無用啦，用套好既軟件只係更快、更得心應手將你既概念實現出黎，而唔係幫你產生概念既～

***

你對人事事坦誠，原來係無用既，根本人地就係鐵板一塊唔聽你講，但衰左就呻你唔幫手！分分鐘重俾面色你睇！

***

「你講佢就訓，訓醒都唔識問」

原來「唔明」呢兩個字比性病更難向人啟齒，唔明～唔明～

突然死亡

27 七月, 2007 in 人之患

近幾個星期「招呼」左幾班 PH 學生，老實講，我對部份學生真係幾唔滿意

果 d 只係諗住黎「遠觀」，一到考試就缺席既學生，我就一早放棄左，好多時第一、二堂就已經知道左邊個係，大佬，我都做過學生，佢地 d 藉口我小學果陣都已經識啦，所以我唔會對佢地有丁點期望，鍾意「坐」就坐到夠啦！

最鬼乞人憎果 d 係又想合格又唔乜想做既學生，咁你想點呢？你自己都見人人都做到身水身汗， case scenario 係咁架啦！咁怕辛苦咁怕麻煩，你咪同主辦單位拎個「免考金牌」咯～

咪以為你俾人玩緊，你連玩具都不如！

***

「突然死亡」係指另一批學生，佢地好搏命咁操、咁溫、咁背，最後入到去竟然即時「死亡」，好多個頂唔住崩潰左喊左出黎，對唔住，整「死」你地都係為你地好，生命無 take two 架！

教學

7 六月, 2007 in 人之患

星期一晚代課，雖然無乜準備，不過最後出黎既效果都唔算太差

呢個三個鐘頭既課堂，係特別加插既，主要執番班學生之前無學過既理論／程序，再教埋之後 PH 要用到既技巧 ＜e.g. Grip & BVM ＞，再再再教埋 PH 既基本程序，連埋動作示範，所以都幾趕下。

班學生返左成日工，專注力同小朋友唔會差好遠，如果氣氛重咁沉悶，你唔死我都死，所以我好反對講者連 presentation slide 都無，講者／聽眾又無互動， flip board 都唔用，照稿讀，唔駛三十分鐘，訓晒！

至於大多人 presentation 犯既問題，之前陳生寫過一篇有關 Keynote 既文，幾好架！

我講明連 handout 都唔派，唔俾錄音，你地要 notes ，可以兩個人一個抄、一個聽，十五分鐘對換，死未？

我點都好過照書、照 notes 講一次丫？

***

好多人永遠都覺得準備時間唔夠，但其實係懶散或者自信心不足，我明白，因為我都好懶！你俾一個月我去準備一個三十分鐘 presentation 我都會覺得準備時間唔夠，如果聽眾係一班有料既大人物的話～

信心係好重要，信心可以來自講者／聽眾對講題既了解同熟悉程度，可以來自雙方既社會地位，講者事前既準備，甚至係一 d 小道具﹔係科網爆破之前，我朋友「表叔」幫一 d 機構搞過電腦課程俾小朋友，由一班教院出黎既老師負責，本來好好地，直至「親子班」開課之前兩三日，「表叔」打電話黎求救，「親子班」因為有家長出席，所有老師一齊縮沙，唉，救命！

咁我同「表叔」教就實無問題架，因為我地做學生果陣已經教過唔少啦～

之前班老師好招積架，之後。。。。

代課

4 六月, 2007 in 人之患

臨時收到通知要代課，用左成三粒鐘先砌起份 Presentation ，趕得我丫！

魔鬼教育

27 五月, 2007 in 生活／感覺, 人之患

今日鬧人鬧到喉嚨痛，值唔值得呢？

同阿輝講電話講到呢個問題，我覺得有我係度教既一日，都想保持係一個高既水平，同埋俾人知道我地同人地之間既分別

呢 d 係咪無謂既自傲呢？

不過我唔否認，當 d 學生分得出我地同護士長教既有幾大分別，我都幾自豪架～

***

呢個世界，好多人好鍾意教人但又無料無方法，或者身懷絕技但偏偏佢地都無果種感染力，又無受過正式既教學訓練，有時見佢地教出黎既成果，真係唔知講乜好

教唔同人，有唔同方法，無色無相又無常，千變萬化，點可以一招「黑龍偷心」走天涯？

人在屋簷下

26 五月, 2007 in 無題／耐人尋味, 人之患

既然想要人地張 Cert. 黎威，去到人地地頭，就要照人地遊戲規則玩啦，重要寸寸貢？咁咪 on XX 咯～咪又要俾多次錢咯

重俾人點埋相添， on XX ！

澤叔姓江、阿姐姓汪

15 十一月, 2006 in 人之患

今晚又耍擔任考官，每次考試過程都幾平淡＜今晚多左一班由大連黎香港受訓既醫生＞，通常開考前主考會向出席考生派發「考試證」，但今晚當主考高聲讀出一名考生名稱﹕「江澤民係唔係度？」，全場考生先肅靜一陣子，跟住全場考生爆笑！

本來取笑別人「姓」、「名」十分無禮，但對不起江澤民同學，係嚴肅既試場爆句咁既說話出黎，真係好難唔笑！＜不過我無笑！＞

我唔知班大連醫生聽唔聽得明「江澤民」三個字既廣東話呢？

而呢位江同學既姓名真係「江」、「澤」、「民」，唔知佢既生活有無因為呢個名稱而唔多方便呢？

講得出，做不到？

12 十一月, 2006 in 生活／感覺, 人之患

我人微言輕，但係人越大，我越希望自己重承諾、一言九鼎，但有時代價都唔細。

今日一起身，我已經好肯定自己病左，係幾緊要果隻，重有 d 暈，唔係好企倒，差 d 行唔倒直線，當然我依家可以係度寫 blog ，即係已經無乜事，但今日真係幾難過。

因為應承左朋友既工作無可能臨時搵人頂上，我唯有硬住頭皮去沖涼、換衫出門，過程好辛苦，我有諗過就咁暈左佢乜都唔理，但我唔俾自己咁做，「責任」、「承諾」、「對唔住自己」呢 d 字眼不斷係我腦裹面轉黎轉去。

終於出左門口，我唔敢食早餐，因為我好驚自己會嘔，份早餐放左落袋等晏 d 再算，為左有時間休息，我選擇左最耐最長但最舒服既路線→搭巴士，可以俾我訓番大半個鐘，唉！我個肚開始唔舒服。。。。

其實上巴士之前，我重盤算緊之後既步行距離頂唔頂得順。

到左總站之後，我個肚仍然唔舒服，跟住要行十幾二十分鐘先到達目的地，過程有少少辛苦，最後捱到左目的地，開始捱剩低既時間。

如果有人留意倒，今朝我塊面一定係青色！

***
如果唔肯定自己身體有乜問題，千祈咪學我！屋企既小朋友唔好學！

洗腦

27 十月, 2006 in 人之患

相信我呢一班學生，已經俾外星人洗左腦，佢地除左記得我係邊個之外，就乜春都唔記得晒，就連我教過乜都唔知。

「大姐，我唔係補習天王丫，我唔識教你地＂貼＂考試題目喎！上堂已經話埋有乜重點有乜要記，重想點？」

「咪叫左你地咪去背果份＂野＂咯！」

「大姐，重未知點去試場？」

「又未教？」

.
.
.
.

今晚，我嘴角滴血！

對不起，嘔泥完畢。

地震

15 九月, 2006 in 無題／耐人尋味, 人之患

今晚八點鐘左右，香港錄得地震，大家感覺得到嗎？

當時我係度用投影機教緊書，忽然螢幕上的 powerpoint 內容不斷有些微跳動＜兩、三秒左右＞，跟住學生同自己感到震動，我重安慰學生應該係附近有大型機器運作。

未到放學，已經有學生通知我收到新聞訊息，真係地震。

*** 上次係香港感受到既地震，已經係上世紀係大埔辦公室裹面。

由艾嘜廿四到萬邦行，由下大雨到孤獨推銷員

13 九月, 2006 in 特衰政府, 生活／感覺, 硬件, 政治幼兒園, 人之患

今晚黃昏經過士丹利街，昅昅 24 inch iMac 有現貨擺出黎未，未有呢。

手痕搞機事敗，諗住過去萬邦行旁搭 12A 離開，不如做下運動行去金鐘搵「阿輝」。

見倒遲來的 Fanny ，無見無耐＜兩、三個月＞，肥左唔少喎，雖然佢大癲大肺，不過唔係太方便問佢。。。喂！蜜運啊？

點解又係我坐？平時我多數主動坐，今日竟然無人坐？

十點幾離開中環，好很大雨丫！

***
繼唐少不斷重覆「擴闊死雞」之後，今日見「推銷員」終於親自上陣，唔知「保皇一族」幾時轉呔呢？

***
今日＜十二號＞，係「哥哥」生忌，尋日，香港失去左一個重要演員，「蝦叔」，關海山先生。

OTEN 好靚仔丫

9 九月, 2006 in 無序社會, 人之患

近排好少好少行亞皆老街一段既旺角，好陌生好似成年無去過咁。

星期四晚可能太趕時間，經過亞皆老街，但完全無留意呢個廣告牌。

今晚係老尖諾士佛臺飲左少少，落到旺角見倒個廣告，我真係醒晒。

似乜？喪屍？古惑仔 on-line game ？